Նախկին բլոգեր Մարիաննա Քաբաբյանը, որն առավել հայտնի է որպես «Mashroom» նորաձևության հարթակի հիմնադիր, պնդում է` բլոգինգը լուրջ աշխատանք է, որը ժամանակ, գիտելիք ու ներդրումներ է պահանջում։ Նա, սակայն, արդեն կես տարի է` չի զբաղվում բլոգինգով և հիմնել է մարքեթինգային ընկերություն, որի գործունեության թիրախում կանայք են։
Մարիաննան պատմում է, որ 2011 թվականին, երբ սկսեց նորաձևության մասին բլոգ վարել, շատ դժվարությունների է հանդիպել. մարդիկ դեռ չէին ընկալում, թե նա ինչով է զբաղված, ինչու է այդքան լուսանկարվում, ու, առհասարակ, լրագրո՞ղ է, թե՞ մոդել։
«Այժմ շատ բան է փոխվել։ Բլոգինգի ոլորտը գերհագեցած է, ինֆլուենսերներն էլ շատ շատ են։ Հիմա ես ավելի օգտակար եմ օֆլայն տիրույթում», -նշում է Քաբաբյանը։
Ասում է` երբ բլոգինգով էր զբաղվում, հիմնականում դժվարություններ էին առաջանում մարդկանց կարծրատիպային մտածողության և իր կին լինելու պատճառով։ Մասնավորապես, լուրջ չէին վերաբերվում նրա ինտելեկտուալ կարողություններին, երբ տեսնում էին, որ բարձրահասակ շիկահեր է։
Այժմ, ըստ Մարիաննայի, բլոգերների համար ավելի հեշտ է, քանի որ քննադատություններն այդքան սուր չեն, և նրանք կարող են իրենց թույլ տալ ավելին, քան նախկինում կարելի էր անել։
«Մարդիկ հետևում են ոչ թե բլոգին, այլ մարդուն։ Յուրաքանչյուր անհատ, որը բաց է ու անկեղծ, շանս ունի մեծ լսարան գրավելու։ Բլոգերը չի կարող հետաքրքիր լինել բոլորի համար. պետք է գտնել թիրախային լսարանը», - ընդգծում է նա։
Քաբաբյանը նաև մի քանի խորհուրդ է տվել սկսնակ բլոգերներին, պատմել է ամուսնալուծությունից հետո առաջացած խնդիրների, մարզերում բնակվող կանանց կայացմանն ուղղված ծրագրի, Հայաստանում ֆեմինիզմի սխալ ընկալման և այլ հետաքրքիր թեմաների շուրջ։
Ավելի մանրամասն` տեսանյութում։
Կարդացեք նաև`