Մահացել է Ռոման Բերեզովսկու մայրը

ԵՐԵՎԱՆ, 12 մայիսի – Sputnik. Ստավրոպոլի մարզի Զելինակումսկ քաղաքում 87 տարեկան հասակում մահացել է ֆուտբոլի Հայաստանի հավաքականի լեգենդար դարպասապահ և մեր ընտրանու դարպասապահների ներկայիս մարզիչ Ռոման Բերեզովսկու մայրը` Մարիա Բերեզովսկայան։

Նշենք, որ Մարիա Բերեզովսկայայի մյուս որդին էլ հեծանվային սպորտի Հայաստանի ֆեդերացիայի նախկին նախագահ Ալեքսանդր Բերեզովսկին է։

Մարիա Բերեզովսկայայի հոգեհանգիստը տեղի կունենա Երևանի Էզրաս Հասրաթյան 9 հասցեում գործող սգո սրահում (Միքայելյան հիվանդանոցի մոտ) մայիսի 14–ին` ժամը 17։00–20։00–ը։

Նշենք, որ Ռոման Բերեզովսկին 1994 թ.–ից խաղացել է Հայաստանի երիտասարդական հավաքականի կազմում, իսկ 1996 թ.–ից` Հայաստանի ազգային հավաքականում։

Մինչ այժմ ազգային հավաքականի կազմում մասնակցել է Եվրոպայի առաջնության չորս (2000, 2004, 2008, 2012) և աշխարհի առաջնության հինգ (1998, 2002, 2006, 2010, 2014) ընտրական փուլերին։ Նա ազգային հավաքականում անցկացրել է 94 խաղ։ Իր մարզչական կարիերան Բերեզովսկին սկսել է 2015 թվականի հուլիսին՝ դառնալով Հայաստանի հավաքականի դարպասապահների մարզիչ։

Բերեզովսկին դարպասապահների մարզիչ է եղել Մոսկվայի «Դինամո» և Սոչիի համանուն թիմերում։ «Սոչիում» եղել է նաև գլխավոր մարզչի պաշտոնակատար։ 2020-ին գլխավորել է Երևանի «Փյունիկը»։

Խոակին Կապառոսի հեռանալուց հետո` 2022 թվականի նոյեմբերի 8-ին, նա նշանակվել է ազգային հավաքականի գլխավոր մարզչի ժամանակավոր պաշտոնակատար։ Ալեքսանդր Պետրակովի նշանակումից հետո նա կրկին մարզում է դարպասապահներին։