Հայաստանում, ինչպես և ողջ աշխարհում, լայն տարածում ունեն կրծքի պլաստիկ վիրահատությունները (կամ մամոպլաստիկան): Սակայն մեր երկիրնարմատապես տարբերվում է մյուսներից նրանով, որ այստեղ կանայք խնդրում են ոչ թե մեծացնել կուրծքը, այլ փոքրացնել։ Այս մասին «Առանց տաբուների» հաղորդաշարի տաղավարում պատմել է պլաստիկ վիրաբույժ Աշոտ Միքայելյանը, որը հասարակության շրջանում առավել հայտնի է որպես Աշոտ Լյուդվիգովիչ։
Նա պատմեց, որ նախորդ տարի 750 վիրահատություն է կատարել, որից 450–ը եղել է քթի, 150–ը` կրծքի, մնացածն էլ` մարմնի այլ մասերի։
«Հիմա տարածված է կրծքի արեոլաների մեծացումը, որ շապիկի տակից երևան։ Նոր տարօրինակություն է, որը սկսում է մասսայական դառնալ»,– նշեց նա։
Վիրաբույժը նկատեց, որ հայկական քթի վիրահատությունը մնում է ամենատարածվածը և էապես տարբերվում է այլ քթերի ռինոպլաստիկայից, քանի–որ կան ոսկրային և մաշկային անատոմիական առանձնահատկություններ։
Հենց այս պատճառով է, որ նա խորհուրդ է տալիս հայերին վիրահատել քիթը Հայաստանում։ Ըստ նրա` ժամանակակից քթի վիրահատությունը պիտանելիության ժամկետ չունի և արվում է ամեն ինչ, որ ժամանակի ընթացքում քիթը չտգեղանա։ Ընդ որում, նա նշում է, որ քթի մի քանի փուլով վիրահատությունը ցանկալի չէ և վատ ելք է համարվում։ Բացի այդ, վիրահատությունից հետո քիթը չպետք է գունափոխվի ցրտից կամ շոգից։
«Ինստագրամի ֆիլտրերի պատճառով մարդիկ անիմեի ու մուլտիկների պատճառով այնպիսի քթեր են ուզում ստանալ, որոնցով անհնար է շնչել», – ընդգծեց բժիշկը։
Աշոտ Լյուդվիգովիչը կարծում է, որ էսթետիկ վիրահատությունները հոգեբանական խնդրի լուծման միջոց են։ Նա վստահ է, որ հիմնականում այս միջոցին դիմում են թերարժեքության բարդույթ ունեցող մարդիկ։
Ըստ վիրաբույժի` վիրահատվողների մեծ մասը կարծում է, որ իր խնդիրները կլուծվեն, եթե արտաքինը շտկվի։
Նա նաև խոսել է ամենատարօրինակ վիրահատական ցանկությունների, տղամարդկանց շրջանում ամենատարածված վիրահատության, հումորի ոլորտից գնալու դրդապատճառների և հնարավոր վերադարձի մասին։
Ավելի մանրամասն`տեսանյութում։