Աշխարհի գավաթում Արթուր Դավթյանը դարձավ եռակի ոսկե մեդալակիր

Տոկիոյի Օլիմպիական խաղերի բրոնզե մեդալակիր, աշխարհի չեմպիոն, Եվրոպայի կրկնակի չեմպիոն Արթուր Դավթյանը նվաճեց իր երրորդ ոսկե մեդալը աշխարհի գավաթի խաղարկության փուլերում, հայտնում են ֆեդերացիայից:

Եգիպտոսի մայրաքաղաք Կահիրեում ավարտվող սպորտային մարմնամարզության աշխարհի գավաթի խաղարկության վերջին՝ 4-րդ փուլի մրցաշարում Հայաստանի հավաքականի առաջատարը հավասարը չունեցավ հենացատկի վարժությունում:

Եզրափակիչում Արթուր Դավթյանը փայլուն ցատկերով վաստակեց 15.166 միավոր և դարձավ ոսկե մեդալակիր:

Մեր մարզիկը ոսկե մեդալ նվաճեց և նաև հռչակվեց աշխարհի բացարձակ գավաթակիր, ինչպես նախորդ տարի:

Հիշեցնենք, որ աշխարհի չեմպիոնը որակավորման փուլը հաղթահարել էր 15.120 միավորով:

Հենացատկի վարժությունում արծաթե մեդալակիր դարձավ Ուկրաինայի ներկայացուցիչ Նազար Չեպուրնին (14.799), բրոնզե մեդալակիր՝ Չեխիայի ներկայացուցիչ Անդրեյ Կալնի (14.333):

Արթուր Դավթյանը հենացատկի վարժությունում ոսկե մեդալներ էր նվաճել նաև աշխարհի գավաթի փուլերի առաջին երկու մրցաշարերում՝ Կոտբուսում և Դոհայում:

Եգիպտոսում ավարտված աշխարհի գավաթի վերջին փուլում արծաթե մեդալակիր դարձավ Գագիկ Խաչիկյանը (նժույգ թափեր), բրոնզե մեդալակիրներ՝ Հարություն Մերդինյան (նժույգ թափեր) և Արթուր Ավետիսյան (օղակներ):