ԵՐԵՎԱՆ, 20 ապրիլի – Sputnik. Հասարակական, քաղաքական գործիչ Էդգար Ղազարյանը հայցադիմում է ներկայացրել ՀՀ վարչական դատարան՝ խնդրելով անվավեր ճանաչել և վերացնել ԱԺ որոշումը, որով Անահիտ Մանասյանը մարդու իրավունքների պաշտպան է ընտրվել։ Այս մասին տեղեկանում ենք Ղազարյանի ֆեյսբուքյան էջից։
Նշենք, որ Ղազարյանն էլ ընդդիմության ՄԻ պաշտպանի թեկնածուն էր։
Ղազարյանը պնդում է, որ վերահիշյալ որոշումը ՀՀ սահմանադրական օրենքով սահմանված ժամկետների խախտմամբ է կայացվել, իսկ Մանասյանը ՀՀ սահմանադրական օրենքի պահանջներին չհամապատասխանող թեկնածու է։
«Մանասյանը մարդու իրավունքների պաշտպանի պաշտոնում առաջադրման և ընտրվելու ընթացքում զբաղեցրել է գլխավոր դատախազի տեղակալի պաշտոնը՝ խախտելով «Դատախազության մասին» օրենքը։ Համաձայն դրա` պետական և տեղական ինքնակառավարման մարմինների ընտրություններին, հանրաքվեներին դատախազը կարող է մասնակցել միայն որպես ընտրող (քվեարկող), իսկ տվյալ դեպքում նա պետական մարմնի ընտրությանը մասնակցել է որպես թեկնածու»,–գրել է Ղազարյանը։
Բացի այդ, Ղազարյանի պնդմամբ, ԱԺ մարդու իրավունքների պաշտպանության և հանրային հարցերի մշտական հանձնաժողովի` ապրիլի 4-ի նիստը, որի ժամանակ քննարկվել են ՄԻՊ պաշտոնում ԱԺ թեկնածու առաջադրելու մասին հարցը, տապալվել է նիստի մի հատվածի ընթացքում քվորումի բացակայության, իսկ մյուս հատվածում` ընդդիմության կողմից առաջադրված թեկնածուի նկատմամբ ֆիզիկական բռնությունների սպառնալիքների, անձնական վիրավորանքների և այլ դրսևորումներով։
Ղազարյանը որպես ԱԺ որոշումն անվավեր ճանաչելու համար հերթական գործոն նշում է այն հանգամանքը, որ Մանասյանը ՄԻ պաշտպանի պաշտոնում ընտրվել է ոչ թե ԱԺ–ի, այլ իրեն առաջադրող խմբակցության կողմից՝ ըստ էության խախտելով քվեարկության գաղտնիությունը։ Հարցն այն է, որ ընտրությանը մասնակցել են միայն ՔՊ–ական 69 պատգամավորներ, որոնք բոլորն էլ կողմ են քվեարկել նրա թեկնածությանը, այսինքն, ըստ Ղազարյանի, փաստացի տեղի է ունեցել ոչ թե գաղտնի, այլ անվանական քվեարկություն։
Հիշեցնենք` ապրիլի 4–ին Ազգային ժողվում մարդու իրավունքների և հանրային հարցերի մշտական հանձնաժողովի նիստը անցավ բավական լարված մթնոլորտում և ՔՊ–ականների ու ՄԻՊ թեկնածու Էդգար Ղազարյանի միջև փոխադարձ վիրավորանքների ուղեկցությամբ։ Մասնավորապես վիրավորանքների տարափով աչքի ընկավ իշխանական պատգամավոր Արթուր Հովհաննիսյանը։
Հավելենք, որ Ղազարյանը պաշտոնապես գրավոր հաղորդում է ներկայացրել ՀՀ գլխավոր դատախազությանը «Քաղաքացիական պայմանագիր» խմբակցության մի շարք պատգամավորների կողմից կատարված առերևույթ մի շարք հանցագործությունների փաստի առնչությամբ։
Խոսքը հենց վերահիշյալ ԱԺ դեպքի մասին է։