ԵՐԵՎԱՆ, 14 մարտի – Sputnik. Հայաստանի Հանրապետությունն ինքնիշխան պետություն է և իրավունք ունի ակնկալել հարգանք իր նկատմամբ։ Մամուլի ասուլիսի ժամանակ հայտարարեց ՀՀ վարչապետ Նիկոլ Փաշինյանը` պատասխանելով Sputnik Արմենիայի հարցին` Հայաստանում «անցանկալի անձ» հայտարարված մարդկանց մասին։
Փաշինյանի խոսքով` Հայաստանն իրավունք ունի ինքնիշխան պետության գործիքակազմը կիրառել իր շահերի դեմ ոտնձգությունները կանխելու համար։
«Այդ մարդիկ պարտավոր են ունենալ հարգանք Հայաստանի նկատմամբ, այդ թվում` ժողովրդի կողմից ընտրված իշխանության նկատմամբ։ Եթե իրենք Հայաստանի նկատմամբ իրենց արածի մի տոկոսը անեին այն երկրների հանդեպ, որտեղ ապրում էին, իրենց տուն չէին կարողանա մտնել առանց վիզայի»,– շեշտեց Փաշինյանը։
Նրա խոսքով` ՀՀ համապատասխան պետական մարմինները լիազորված են կայացնել «անցանկալի անձ» ճանաչելու վերաբերյալ որոշումներ` ՀՀ օրենսդրության հիման վրա։
Sputnik Արմենիայի թղթակիցը նաև առաջարկեց հրապարակել ամբողջական ցանկ` այն մարդկանց անուններով, որոնց արգելված է Հայաստան մուտք գործել, որտեղ նաև նշված կլինեն այդ որոշման պատճառները։
Հիշեցնենք` օրերս ռուս լրագրող և հրատարակիչ, «Նյուս Մեդիա» հոլդինգի հիմնադիր Արամ Գաբրելյանովին թույլ չտվեցին մուտք գործել Հայաստան։ 2022 թվականի հոկտեմբերին հայտնի դարձավ, որ «Ռոսիա սեգոդնյա» մեդիախմբի և RT հեռուստաալիքի գլխավոր խմբագիր Մարգարիտա Սիմոնյանին և Պետդումայի ԱՊՀ հարցերով կոմիտեի առաջին տեղակալ Կոնստանտին Զատուլինին Հայաստանի կառավարությունն արգելել է մուտք գործել երկիր։
Հունվարին հայտնի դարձավ, որ ՀՀ իշխանությունները Հայաստանի համար անցանկալի անձ են ճանաչել Ֆրանսիայի «ՀՅԴ նոր սերունդ» երիտասարդական միության Կենտրոնական վարչության ատենապետ Նժդեհ Գարագավորյանին:
Ամիսներ առաջ Հայաստանի համար անցանկալի անձ ճանաչվեցին ՀՅԴ մի քանի ղեկավարները (Մուրադ Փափազյան, Մասիս Աբրահամյան) և ՀՅԴ Հոլանդիայի «Գարեգին Նժդեհ» երիտասարդական միության անդամ Սյունե Աբրահամյանը: