Պետական եկամուտների կոմիտեն կանխել է Բագրատաշենի մաքսակետով ՌԴ անօրինական ճանապարհով ծխախոտի խմբաքանակի արտահանումը։ Տեղեկությունը հայտնում է ՊԵԿ մամուլի ծառայությունը` նշելով, որ 303 հազար 460 տուփ տարբեր տեսակի ծխախոտը թաքցված է եղել խաղողի արկղերում։
Տեսազննման և ռենտգեն զննման ժամանակ խաղողի արկղերում որևէ խնդիր չի հայտնաբերվել, ծխախոտները հայտնաբերվել են խորը զննման անգարում։
«Պարզվել է, որ արկղերի գերակշիռ մասը, որոնցով տեղափոխվել են ապրանքները, հատուկ հարմարեցված են` ունեն երկու հատակ, ինչը ապրանքների հայտնաբերումը դժվարացնող այլ եղանակներով կամ ապրանքներին այլ տեսք տալու միջոց է»,–նշված է հաղորդագրության մեջ:
Ապրանքների տեսազննումից պարզվել է, որ մի մասի վրա առկա են ակցիզային դրոշմանիշներին նմանվող այլ պիտակներ, որոնք չեն համապատասխանում ՊԵԿ-ի կողմից տրամադրող ակցիզային դրոշմանիշներին, իսկ մնացած մասի վրա ընդհանրապես ակցիզային դրոշմանիշներ առկա չեն:
Արարքն իր մեջ պարունակում է «Մաքսային կարգավորման մասին» ՀՀ օրենքի 313 հոդվածի հատկանիշներ: «Մաքսային կարգավորման մասին» տվյալ հոդվածը սահմանում է՝ ՀՀ պետական սահմանով մաքսային հսկողության ներքո գտնվող ապրանքների տեղափոխումը` մաքսային հսկողությունից թաքցնելով` գաղտնարանների օգտագործմամբ, ապրանքների հայտնաբերումը դժվարացնող այլ եղանակներով կամ ապրանքներին այլ տեսք տալու միջոցով:
Դեպքի առնչությամբ նյութերն ուղարկվել են ՊԵԿ հետաքննության և օպերատիվ հետախուզության վարչություն` հետագա ընթացքն ապահովելու նպատակով: