Մահվան ելքով վրաերթ. փախուստի դիմած վարորդը հայտնաբերվել է Երևանում

ԵՐԵՎԱՆ, 22 փետրվարի - Sputnik. Երևան-Արմավիր ճանապարհի 12-րդ կիլոմետրին անհայտ մակնիշի ավտոմեքենայի վարորդը վրաերթի է ենթարկել 73-ամյա մի տղամարդու։ Նա տեղում մահացել է, իսկ վարորդը դեպքի վայրից դիմել է փախուստի։ Տեղեկությունը հայտնում են ՀՀ ոստիկանությունից հավելելով, որ դեպքը տեղի է ունեցել փետրվարի 20-ին, ժամը 06.30-ի սահմաններում։

Քրեական ոստիկանության և Վաղարշապատի բաժնի ծառայողների համատեղ ձեռնարկած օպերատիվ-հետախուզական միջոցառումների արդյունքում պարզվել է, որ վրաերթը կատարել է Կոտայքի մարզի 70-ամյա մի բնակիչ՝ իր վարած «Ռենո» մակնիշի մեքենայով։

Դեպքից ժամեր անց Վաղարշապատի բաժնի քրեական հետախույզները Երևանի Շերամի փողոցում նրան ձերբակալել ու, մեքենայով հանդերձ, բաժին են տեղափոխել։

Տղամարդը ներկայացվել է Վաղարշապատի քննչական բաժին և տվել խոստովանական ցուցմունք։