Կառավարությունն Ալավերդու դպրոցներից մեկի շենքը վաճառում է երևանյան բնակարանի գնով

ԵՐԵՎԱՆ, 16 փետրվարի – Sputnik. Կառավարությունը որոշել է վաճառել Ալավերդի քաղաքի Զորավար Անդրանիկի 197 հասցեում գտնվող դպրոցի շենքն ու հողամասը ընդամենը 58 635 000 դրամով (146 500 դոլար)։ Ընդ որում, դրանից 2 082 370 դրամը հողամասի շուկայական արժեքն է։

Դպրոցի շենքն այդ գնով օտարելու որոշումն ընդունվել է կառավարության այսօրվա նիստում` առանց զեկուցման ու քննարկման։

Տարածքային կառավարման և ենթակառուցվածքների նախարարության ներկայացրած հիմնավորման մեջ, սակայն, նշվում է, որ վերոհիշյալ գինը դպրոցի նախնական գնահատված արժեքի 60 տոկոսն է, և որ գինը նվազել է, քանի որ 2022թ–ի օգոստոսին ու նոյեմբերին հայտարարված օտարման մրցույթները չեն կայացել հայտեր չլինելու պատճառով։

Նախագծում ասվում է, որ դպրոցը կառուցվել է 1952 թվականին և ներկայում չի շահագործվում։

Շենքի մակերեսը 2153.12 քառակուսի մետր է, հողամասինը` 0.1109 հեկտար։

Համեմատության համար նշենք, որ Երևանի ծայրամասերում (Էրեբունի, Նոր Նորք) 100 քմ մակերեսով բնակարանների գինը երկրորդային շուկայում այսօր 100 000 դոլար է։