ԵՐԵՎԱՆ, 10 փետրվարի – Sputnik. Հայաստանի Հանրապետության ազգային ժողովը վավերացրեց ԵԱՏՄ–ի և Սինգապուրի հետ ազատ առևտրի համաձայնագիրը, ինչի շնորհիվ ՀՀ–ում արտադրված ապրանքը Սինգապուր կներմուծվի առանց մաքսատուրքի։ Պատգամավորներից 71-ը կողմ է քվեարկել վավերացմանը, իսկ 23-ը` ձեռնպահ («Հայաստան» խմբակցություն)։
Ավելի վաղ հայտնել էինք, որ ՀՀ էկոնոմիկայի նախարար Վահան Քերոբյանը ներկայացնելով համաձայնագիրը նշել էր, որ Հայաստանի համար առաջնային ուղղությունները կարող են լինել տեխնոլոգիական համագործակցությունն ու ներդրումների ներգրավումը։
Համաձայնագիրը ստորագրվել է 2019 թվականի հոկտեմբերի 1-ին։ Հայաստանը Միության երկրներից առաջինը վավերացրեց փաստաթուղթը։ Համաձայնագրի նպատակն է ստեղծել շահավետ պայմաններ փոխադարձ առևտրային հարաբերությունների զարգացման ու տնտեսական համագործակցության խթանման համար:
Այս փաստաթղթով նախատեսվում է գրեթե բոլոր ապրանքատեսակների մաքսատուրքերի վերացում։ ԵԱՏՄ–ն Սինգապուրի համար մաքսատուրքեր կթողնի շաքարի, կաթի, որոշ այլ տեսակի պարենային ապրանքների, ինչպես նաև թեթև մարդատար ավտոմեքենաների և պոլիմերների որոշ տեսակների համար։ Սինգապուրն ամբողջությամբ կչեղարկի մաքսատուրքերը, ընդ որում` դա կանի միանգամից, իսկ ԵԱՏՄ–ն փուլ առ փուլ, 10 տարվա ընթացքում։
Սինգապուրի հետ ԵԱՏՄ երկրների առևտուրը 2021 թվականին կազմել է մոտ 3.5 մլրդ դոլար, որից Հայաստանին բաժին է հասել փոքր մասը` արտահանումը` 500 հազար դոլարից պակաս, ներմուծումը` 2.2 մլն–ից ավելի։ Հայաստանը հիմնականում արտահանում է ծխախոտ և էլեկտրոնային սարքավորումների փոքր խմբաքանակներ, իսկ ներկրում է հիմնականում տարբեր տեսակի սարքավորումներ, ինչպես նաև փոքր ծավալով նավթամթերք և ոսկերչական իրերի հումք։