2018 թվականի հոկտեմբերից ի վեր «Ռոսկոսմոսն» առաջին անգամ ժամանակակից ՌԴ–ի պատմության մեջ տիեզերական հրթիռների անընդմեջ 100 անվթար արձակում է իրականացրել։
Ինչպես հայտնում է «Ռոսկոսմոսը»` «Բայկոնուր» տիեզերակայանից իրականացվել է 46 մեկնարկ, «Պլեսեցկից»` 36, «Վոստոչնի» տիեզերակայանից և Գվիանայի տիեզերական կենտրոնից էլ` 9-ական։
Դրանցից 82–ը բաժին են հասել «Սոյուզ» հրթիռներին, 11-ը` «Պրոտոն-Մ»–ին, 4-ը` «Անգարային», մնացած 3-ը` «Ռոկոտ» կրող հրթիռներին։
Փետրվարի 9-ին «Ռոսկոսմոսը» հայտնել է նաև, որ «Սոյուզ-2.1ա» հրթիռը, որի վրա պատկերված է «Մայր հայրենիքը կանչում է» հուշարձանը, մեկնարկել է «Բայկոնուր» տիեզերակայանից, Միջազգային տիեզերակայան «Պրոգրես ՄՍ-22» բեռնատար տիեզերանավն ուղարկելու համար։
Հրթիռը պետք է բեռնատարը դուրս բերի երկրի շուրջ գտվող ուղեծիր, որից հետո այն ինքնուրույն կթռչի դեպի Միջազգային տիեզերակայան։ Արձակումը նվիրված է Ստալինգրադի ճակատամարտում տարած հաղթանակի 80-ամյակին։
«Պրոգրես ՄՍ-22»–ը ՄՏԿ ավելի քան 2.5 տոննա բեռ կհասցնի։ Այն ներառում է 1354 կգ չոր բեռ անձնակազմի համար և կայանի համակարգեր, 720 կգ վառելիք, 420 լ խմելու ջուր, 40 կգ ազոտ, տիեզերական ուսումնասիրությունների սարքեր։
Հիշեցնենք, որ 2021 թվականի հունիսին ՌԴ ժամանակակից պատմության մեջ ազգային ռեկորդ էր սահմանվել` տիեզերական կրող հրթիռների անընդմեջ 60 հաջող արձակում իրականացնելով։ Նախորդ ձեռքբերումը կազմել էր 59 արձակում, որն իրականացվել էր 1992 թվականի փետրվարից մինչև 1993 թվականի մարտ ընկած ժամանակահատվածում։