ԵՐԵՎԱՆ, 20 հունվարի - Sputnik. Արցախյան 44-օրյա պատերազմում զոհվածների ծնողների և կարմիրբերետավորների հետ մոտ 1 ամիս առաջ առերեսում է տեղի ունեցել, սակայն դրանից հետո ՀՀ քննչական կոմիտեում ոչ մի գործողություն տեղի չի ունենում։ Այս մասին լրագրողների հետ զրույցում ասաց 44-օրյա պատերազմում զոհված Արման Ազատյանի հայրը` Վիգեն Ազատյանը։
«Մեկ ամիս է, որ քննչական կոմիտեում ոչ մի գործողություն տեղի չի ունենում։ Ցանկանում ենք ճշտել, թե ինչ հրաման է կատարվում։ Մոտ 3 ոստիկանի հետ առերեսում է եղել, բայց դրանից հետո 1 ամսից ավելի է`ոչ մի տեղեկություն և գործողություն չկա։ Երեք ծնող է եղել առերեսմանը` յուրաքանչյուրն իրեն բռնող ոստիկանի հետ։ Դեպքի առնչությամբ պետք է պատժվեն ոչ միայն «կարմիր գլխարկները» (նկատի ունի կարմիրբերետավորներին,– խմբ.), ապա նրանց հրաման տվողները, իսկ վերջում էլ` համար մեկ պատասխանատուն»,– ասաց Ազատյանը։
Հարցին, թե ինչպես են ոստիկանները մեկնաբանում 2022 թվականի սեպտեմբերի 21-ին Եռաբլուրում տեղի ունեցածը, նա շեշտեց . «Ասում են` սխալմունք է տեղի ունեցել, կներեք»։
Վիգեն Ազատյան
© Sputnik / Aram Nersesyan
Ազատյանը շեշտեց, որ ծնողները կասկածներ ունեն` Արգիշտի Քյարամյանը հրաման է ստացել գործընթացը դադարեցնել, և վերջինս չի ունենա իրավական ու քաղաքական կամք մեղավորներին պատժելու։
Մխիթար Գալեյանի հայրը` Գարիկ Գալեյանն էլ ընդգծեց, որ դեպքից արդեն 5 ամիս է անցել, բռնի ուժ կիրառած ոստիկանները նույնականացված են, բայց մինչ օրս որևէ ոստիկանի մեղադրանք չի առաջադրվել։
Գարիկ Գալեյան
© Sputnik / Aram Nersesyan
«Երեկվա դեպքն (Ազատ գյուղի զորամասերից մեկում բռնկված հրդեհի պատճառով 15 զինվոր է մահացել,–խմբ) արագ «բացահայտեցին», բայց սեպտեմբերի 21-ից արդեն 5 ամիս է անցել, դեռ ոչ մի բան չեն բացահայտել այն դեպքում, երբ տեսանյութեր կան, լուսանկարներ կան։ Սա խոսում է այն մասին, որ քննչական կոմիտեն թուրքական գործողություններ է կատարում»,– ասաց Գալեյանը։
Զոհված Ժորա Մարտիրոսյանի մայրը` Ազգուշ Մարտիրոսյանը, վստահ է` ամեն ինչի համար առաջինը պետք է պատժվի ՀՀ վարչապետ Նիկոլ Փաշինյանը, բայց, ըստ նրա, ներկայիս իրականությունը հաշվի առնելով`պետք է սկսել հենց ՔԿ–ից` Արգիշտի Քյարամյանից։ Նա շեշտեց, որ ինքը եղել է առերեսում անցած ծնողներից մեկը։
Ազգուշ Մարտիրոսյան
© Sputnik / Aram Nersesyan
«Ես առերեսվել եմ, ոստիկաններն էլ ընդունում են իրենց մեղքը, ներողություն են խնդրում։ Այժմ գրել են, որ առերեսումները կասեցվել են»,– ասաց Մարտիրոսյանը։
Այս պահին ծնողները քննչական կոմիտե են մտել։
Հիշեցնենք` զոհված զինծառայողների ծնողները սեպտեմբերի 20-ի լույս 21-ի գիշերը հերթապահում էին Եռաբլուրում, որպեսզի տապալեին վարչապետ Նիկոլ Փաշինյանի այցը զինվորական պանթեոն։ Սակայն սեպտեմբերի 21-ի առավոտյան ոստիկանությունը, ուժ կիրառելով, նրանց հեռացրեց տարածքից, զոհվածների ծնողներին տեղափոխեցին բաժանմունք, ինչից հետո իշխանության ներկայացուցիչները կարողացան ծաղիկներ և ծաղկեպսակներ դնել։
Նույն օրը հայտնի դարձավ, որ ՀՀ ոստիկանության պետի հանձնարարությամբ ոստիկանության ծառայողների գործողությունների վերաբերյալ ծառայողական քննություն է սկսվել։