ԵՐԵՎԱՆ, 20 հունվարի – Sputnik. Գեղաքունիքում ողբերգական դեպքից մահացած 15 զինվորներից 14-ին փրկարարները հայտնաբերել են մահճակալներին պառկած վիճակում։ Այս մասին Հանրային հեռուտաընկերության «Հանրային քննարկում» հաղորդման ժամանակ հայտարարեց ՆԳՆ Փրկարար ծառայության գնդապետ Արսեն Սարոյանը։
«Վարկած է, որ տղաները ծխահարվել են և ուղղակի չեն արթնացել, անկողնուց դուրս չեն եկել։ Մի հոգին մուտքի մոտ է հայտնաբերվել, փորձել է փրկվել, բայց չի ստացվել»,-ասաց Սարոյանը։
Փրկարար ծառայության գնդապետը հայտնեց, որ այդ շինության ներսում 21 հոգի են եղել։ Մինչև փրկարարների հասնելը 6-ը դուրս են եկել իրենց ուժերով, երեք ինչպես արդեն հայտնի է տարբեր այրվածքներով տեղափոխվել են Վարդենիսի բուժկենտրոն, այնուհետև Երևան։
Անդրադառնալով հարցին՝ հնարավոր էր կրակն այդքան արագ տարածվեր, Սարոյանը նշեց, որ շենքը ամբողջությամբ քարից չէր, «բաղդադ» տիպի շինություն է եղել, և ամենայն հավանականույթամբ կրակի արագ տարածման պատճառը դա է։
Ինչ վերաբերվում է կանխելուն, նա չբացառեց, որ եթե սկզբնական բոցավառման փուլում հրդեհամամարման սարքեր լինեին, հնարավոր կլիներ ինչ-որ բան փոխել։
Հիշեցնենք` հունվարի 19-ին՝ ժամը 01:30-ի սահմաններում, հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Հրդեհի հետևանքով զոհվել է 15, վնասվածքներ ստացել` 7 զինծառայող, նրանցից չորսը բուժօգնություն ստանալուց հետո դուրս են գրվել, 3–ը տեղափոխվել են Երևան՝ Այրվածքաբանության ազգային կենտրոն։ Երկուսի վիճակը ծանր է։
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարն ու այլ բարձրաստիճան զինվորականներ։
Քրեական վարույթ է նախաձեռնվել ՀՀ քրեական օրենսգրքի 532-րդ հոդվածի 4-րդ մասի հատկանիշներով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ)։