Ռուսաստանի դեմ ակտիվորեն օգտագործվում են ՆԱՏՕ-ի անդամ երկրների ռազմական ներուժն ու հնարավորությունները։ ՌԴ պաշտպանության նախարարության կոլեգիայի նիստում այս մասին հայտարարել է Ռուսաստանի նախագահ Վլադիմիր Պուտինը:
«Այնուամենայնիվ, մեր զինվորները, սերժանտներն ու սպաները քաջաբար և համառ պայքարում են հանուն Ռուսաստանի։ Նրանք վստահորեն քայլ առ քայլ լուծում են առաջադրված խնդիրները»,- ասել է Ռուսաստանի նախագահը։
Նրա խոսքով՝ հատուկ գործողության ընթացքում ՌԴ-ին հակազդելու համար կիրառվող ՆԱՏՕ-ի ուժերի մասին տեղեկությունները հայտնի են։ Այս ամենը պետք է մանրակրկիտ վերլուծվի և օգտագործվի Ռուսաստանի Դաշնության զինված ուժերի կառուցման, զորքերի և հատուկ ծառայությունների մարտական հնարավորությունների ավելացման համար։
Պուտինը նշել է, որ ամբողջ Ռուսաստանում, այդ թվում՝ նոր տարածքներում, կապահովվի քաղաքացիների անվտանգ կյանքը, իսկ Ռուսաստանը կշարունակի մեծացնել իր ռազմական ներուժը։
Խոսելով անօդաչու թռչող սարքերի մասին՝ նա նշել է, որ երկիրը ստորջրյա եզակի անօդաչու սարքերի մշակման լավ փորձ ունի։ Բացի այդ, ռազմարդյունաբերությունն ունի բոլոր հնարավորությունները լավագույն տեխնիկական բնութագրերով օդային և ցամաքային անօդաչու սարքերի լայն տեսականի ստեղծելու համար, այդ թվում արհեստական բանականության օգտագործմամբ:
«Շնորհակալություն եմ հայտնում տանկիստներին, դեսանտայիններին, հրետանավորներին, մոտոհրաձիգներին, սակրավորներին, կապավորներին, օդաչուներին, հատուկ նշանակության ուժերի և ՀՕՊ-ի մարտիկներին, նավաստիներին, ռազմական տեղագրագետներին, թիկունքային ապահովման ստորաբաժանումների մասնագետներին, Ռոսգվարդիայի և այլ կազմավորումների անձնակազմին՝ ձեր պայքարի համար։ Մարտնչում եք (և սրանք բարձրագոչ խոսքեր չեն)` ինչպես 1812 թվականի պատերազմի, Առաջին համաշխարհային պատերազմի կամ Հայրենական մեծ պատերազմի հերոսները», - ասել Է Պուտինը։
Ռուսաստանի նախագահը նաև հատուկ շնորհակալություն է հայտնել ռազմական բժիշկներին, որոնք փրկում են մարտիկներին՝ վտանգելով իրենց կյանքերը։
Հիշեցնենք՝ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 299-րդ օրը։