ԵՐԵՎԱՆ, 15 դեկտեմբերի – Sputnik. Երևանի պետական համալսարանի ուսանողները փակեցին ՌԴ դեսպանատան մուտքը։ Նրանք արդեն բավական ժամանակ է` դիվանագիտական կառույցի մոտ են և պահանջում են, որպեսզի որևէ մեկն իջնի ու վերցնի իրենց դիմում–բողոքը։
Հայտնել ենք, որ «Արցախ», «Միացում», «Տեր ենք մեր հայրենիքին», «Արցախ, սփյուռք, Հայաստան» վանկարկումներով այսօր բողոքի ակցիայի են դուրս եկել Երևանի պետական համալսարանի ուսանողները։ Նրանք երթով հասել են ՄԱԿ–ի գրասենյակի մոտ, որտեղից էլ գնացել են ՀՀ–ում ՌԴ դեսպանատուն։
«Կանգնելու ենք այստեղ այնքան, մինչև գան և վերցնեն իրենց նամակը։ Ուղղակի որևէ արկղի մեջ գցելը ճիշտ չէ»,– ասաց ուսանողներից մեկը։
Ուսանողները դիմում–բողոքում ներկայացրել են Արցախում ստեղծված իրավիճակը, հումանիտար ճգնաժամը և այն, որ Ադրբեջանը ցեղասպան քաղաքականություն է վարում արցախահայության դեմ։
Հիշեցնենք՝ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։
Դեկտեմբերի 13-ից ադրբեջանական կողմն անջատել է նաև Արցախի գազամատակարարումը։ Մարդիկ զրկված են ջեռուցումից, տաք ջրից, բուժհաստատությունները չեն կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել է դասապրոցեսը։