«Մենք փորձադաշտ չենք». Բրյուսովի անվան համալսարանի ուսանողները շարունակում են դասադուլը

Երևանի Բրյուսովի անվան պետական համալսարանի հազարավոր ուսանողներ այսօր հավաքվել են համալսարանի տարածքում և շարունակում են դասադուլը, քանի որ նրանց չի գոհացրել ՀՀ կրթության, գիտության, մշակույթի և սպորտի նախարար Վահրամ Դումանյանի հայտարարությունը։

Ավելի վաղ հայտնել էինք, որ կառավարությունը որոշել է համալսարանը միացնել Հայաստանի ֆիզիկական կուլտուրայի և սպորտի պետական ինստիտուտին ու դարձնել Հայկական պետական մանկավարժական համալսարանի մաս։ Այս որոշումը զայրացրել է բուհի ուսանողներին, նրանք հոկտեմբերի 12-ից դասադուլ են անում։ Երեկ Դումանյանը լրագրողների հետ զրույցում հաստատեց, որ համալսարանները միավորելու նախագիծ կա, համապատասխան կարգով որոշում կկայացվի ու կանցնեն առաջ։ Նա նշեց, որ ոչինչ կտրուկ չի փոխվելու, ու պրոցեսն ընդամենը բարձրագույն կրթության որակի բարելավման համար է։

Համալսարանի քաղաքագիտության բաժնի 4–րդ կուրսի ուսանող Էդգար Զատիկյանը Sputnik Արմենիայի հետ զրույցում ասաց, որ իրենց համար անհասկանալի է Դումանյանի ասածը, թե բովանդակային առումով ոչինչ չի փոխվելու, իրենք մնալու են նույն շենքում։

Համալսարանի մագիստրատուրայի միջազգային հարաբերություններ բաժնի 2–րդ կուրսի ուսանող Լիդա Հարությունյանն էլ շեշտեց, որ երեկ նախարարին չհաջողվեց հիմնավոր պատասխան տալ, թե ինչու պետք է կցվեն այլ համալսարանի։

«Ինչ վերաբերում է նախարարի այն հայտարարությանը, թե սա ծրագիր է ակադեմիական քաղաք ստեղծելուց առաջ, ապա դա հիմա ավելի քան անիրատեսական է։ Գաղտնիք չէ, որ մեր երկիրը նման ակադեմիական քաղաք ստեղծելու ֆինանսական հնարավորություն դեռևս չունի։ Հետագայում միգուցե դա լինի, ու մենք ևս ուրախ լինենք դրա համար, բայց հիմա դրա ժամանակը չէ»,–ասաց նա։

Նշենք, որ մոտ 2500 ուսանող արդեն իսկ ստորագրել են, որ դեմ են որևէ համալսարանի մաս դառնալու գաղափարին։

Նրանք պահանջում են, որ բուհերը միավորելու որոշումը փոխվի, հակառակ դեպքում հոկտեմբերի 17-ից նստացույց կանեն կառավարության շենքի մոտ և հանդիպում կպահանջեն ՀՀ վարչապետի հետ։