ԵՐԵՎԱՆ, 13 սեպտեմբերի – Sputnik. Ազգային ժողովի մոտ բողոքի ակցիա իրականացնող զոհված զինծառայողների հարազատներից մեկը ջուր լցրեց փողոցով անցնող «Քաղաքացիական պայմանագիր» խմբակցության անդամ Հովիկ Աղազարյանի վրա։
Դրանից հետո իրավիճակը բավականին լարվեց ցուցարարների և ոստիկանների միջև, ոստիկանները փորձեցին բերման ենթարկել այն կնոջը, որը ջուր էր լցրել պատգամավորի վրա։ Ցուցարարները թույլ չտվեցին։
Այնուհետև բողոքի ակցիայի մասնակիցները քայլեցին դեպի Ազգային ժողովի Դեմիրճյանի փողոցի մուտք, որտեղ, սակայն, նրանց դիմավորեց ոստիկանական պատը։
Զոհվածների ծնողները մոտեցել են ոստիկաններին՝ խնդրելով չկանգնել ժողովրդի առաջ, վախը մի կողմ դնել և իրենց կողմ անցնել՝ իշխանություններին ժամ առաջ հեռացնելու համար։
44-օրյա պատերազմում զոհված հրետանավոր Հայկ Մելիքյանի մորաքույրը՝ Անահիտ Մանասյանը, Sputnik Արմենիայի թղթակցի հետ զրույցում նշեց, որ Ազգային ժողովի մոտ են հավաքվել պատգամավորներից պատասխան ստանալու «նրանց ցինիկ ելույթների համար»։
«Չի կարելի ամեն անգամ մեր նյարդերի, արժանապատվության հետ խաղալ։ Բացի այդ, մենք իմացանք, որ նախկին նախագահներն ու Վեհափառը համախմբվելու են, միասնական թեկնածու են առաջադրելու, ուզում ենք իմանալ, թե դա երբ է լինելու, սպասում ենք, որ նրանք գան, մեզ առաջնորդեն, չենք ուզում «պատերազմ, հարձակում» բառերի փոխարեն շարունակեն օգտագործել «սադրանք, սահմանային լարվածություն», բոլոր թվերը կեղծվում են»,- նշեց Մանասյանը։
Հիշեցնենք՝ Արցախյան44-օրյա պատերազմում զոհված զինծառայողների ծնողները բողոքի ակցիա են իրականացնում Ազգային ժողովի դիմաց` հայ–ադրբեջանական սահմանին տիրող իրավիճակի պատճառով։ Կոչ են անում ժողովրդին միանալ իրենց և ներկա իշխանություններին հեռացնել երկրի ղեկից՝ Հայաստանն այս ծանր իրավիճակից դուրս բերելու համար։