Սպանության, սպանության փորձի ու ավազակության համար մեղադրվող արզականցին կալանավորվել է

ԵՐԵՎԱՆ, 5 սեպտեմբերի – Sputnik. Երկու անձի սպանության, ևս երկու անձի նկատմամբ սպանության փորձ և ավազակություն կատարելու, ինչպես նաև այլ անձի բնակարան ներխուժելու համար մեղադրվող Արզական գյուղի 46-ամյա բնակիչ Զորիկ Մելքոնյանը կալանավորվել է։ Տեղեկությունը հայտնում է ՀՀ քննչական կոմիտեի մամուլի ծառայությունը։

Ձեռք բերված բավարար ապացույցների համակցությամբ՝ 46-ամյա տղամարդուն մեղադրանք է առաջադրվել ՀՀ քրեական օրենսգրքի 155-րդ հոդվածի 2-րդ մասի 9-րդ կետով (Սպանություն, որը կատարվել է մերձավոր ազգականի կողմից), 155-րդ հոդվածի 1-ին մասով (Սպանությունը` ապօրինաբար մեկ ուրիշին կյանքից զրկելը), 44-155-րդ հոդվածի 1-ին մասով (2 դրվագ) (Սպանության փորձ), 207-րդ հոդվածի 1-ին մասով (Բնակարանի անձեռնմխելիությունը խախտելը) և 252-րդ հոդվածի 2-րդ մասի 5-րդ կետով (Ավազակություն, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ):

Նախաքննությունը շարունակվում է: Ձեռնարկվում են անհրաժեշտ միջոցառումներ՝ դեպքերի բոլոր հանգամանքները պարզելու, օբյեկտիվ և բազմակողմանի քննություն ապահովելու, ցուցմուքններում մատնանշված հանգամանքներն ստուգելու ուղղությամբ:

Հիշեցնենք, որ օգոստոսի 27-ին Մելքոնյանը տանը սպանել է իր կնոջը, ապա մտել հարևանի տուն ու դանակահարել հարևանին և նրա կնոջը։ Դրանից հետո՝ օգոստոսի 30-ին, նա Կոտայքի մարզի Բալահովիտ գյուղի 8-րդ փողոցում գտնվող ընկերության տարածքում դանակով հարվածներ է հասցրել նույն ընկերության երկու աշխատակցի, ինչի հետևանքով նրանցից մեկը մահացել է, իսկ մյուսը տեղափոխվել է «Աբովյան» բժշկական կենտրոն: Իսկ մինչ այդ Մելքոնյանը, Աբովյան քաղաքի Երևանյան փողոցում գտնվող բենզալցակայանում ցուցադրելով ձեռքին եղած դանակը, պահանջել է գումար և սննդամթերք:

Փաստացի օգոստոսի 27-ից Զորիկ Մելքոնյանը հետախուզման մեջ էր։ Սեպտեմբերի 3-ին նա ներկայացել է Չարենցավանի բաժին ու ձերբակալվել։ Խոստովանական ցուցմունքի ընթացքում հայտնել էր, որ իր կնոջը` Սեդա Պ.-ին, և 34-ամյա Սոս Գ.-ին սպանել է ինքը, ինչպես նաև դանակահարել և մարմնական վնասվածքներ է հասցրել 3 անձի։