ԵՐԵՎԱՆ, 2 սեպտեմբերի – Sputnik. Մթնոլորտային օդի աղտոտվածության հետևանքով Հայաստանում յուրաքանչյուր տարի մահանում է 51 մարդ՝ 100 000 բնակչի հաշվով։ Ֆեյսբուքյան իր էջում նման գրառում է արել ԵՊԲՀ ռեկտոր Արմեն Մուրադյանը։
Նրա խոսքով` մթնոլորտային օդի աղտոտվածության հետևանքով մահացության ցուցանիշով ՀՀ–ն Հարավային Կովկասի պետությունների շրջանում նվազագույն ցուցանիշն ունի (Վրաստան՝ շուրջ 66, Ադրբեջան՝ շուրջ 56 մահ 100 000 բնակչի հաշվով)։ Սակայն մի քանի անգամ բարձր է Արևմտյան Եվրոպայի երկրների ցուցանիշներից, օրինակ՝ Դանիայում մթնոլորտային օդի աղտոտվածության հետևանքով գնահատված մահերի թիվը կազմում է շուրջ 14՝ 100 000 բնակչի հաշվով, Ավստրիայում՝ 15, իսկ Բելգիայում՝ 16:
«Վերջերս «Սուրմալու» առևտրի կենտրոնում տեղի ունեցած ողբերգական պատահարը, բացի արտակարգ իրավիճակներում համալիր արձագանք ապահովելու անհրաժեշտությունից, առաջ բերեց հանրային առողջության ապահովման համար առանցքային ևս մեկ հիմնախնդիր՝ օդի աղտոտվածության հարցը: Համաձայն Առողջապահության համաշխարհային կազմակերպութան վերջին տվյալների՝ օդի աղտոտվածության խնդիրը բնորոշ է գործնականում աշխարհի բոլոր պետություններին, թեև առավել արդիական է ցածր և միջին եկամուտներ ունեցող երկրների համար, որոնց շարքում է նաև Հայաստանը»,–գրել է Մուրադյանը։
Նրա խոսքով` հաճախ պարզագույն գործողություններով և վարքագծով կարող ենք էական ներդրում ունենալ ապագա սերունդների համար առողջ միջավայր ստեղծելու գործում:
Օրինակ, երթևեկության ծանրաբեռնված ժամերին ավտոմեքենա չվարելը, հնարավորության դեպքում աշխատանքի ոտքով հաճախելը, աղբի տեսակավորումը, աղբի այրելուց հրաժարվելը, էլեկտրաէներգիան խնայողաբար օգտագործելը շրջակա միջավայրի մասին հոգատար և խնամքով վերաբերմունքի լավ դրսևորումներ են: