ՌԴ ԶՈւ-ն ճնշել է ուկրաինական զորքի անսպասելի գրոհը։ Այս մասին պատմել է ՌԴ մարտական Ка-52 ուղղաթիռի շտուրմանը։ Համապատասխան տեսանյութը, ինչպես նաև Ուկրաինայում հատուկ գործողությունների շրջանակում Ка-52-ի մարտական աշխատանքի կադրերը հրապարակել է ՌԴ ՊՆ-ն։
Նախօրեին հայտնել էին, որ ՌԴ ԶՈւ–ն Նիկոլաևի և Խերսոնի մարզերում հետ է մղել ուկրաինական զորքի գրոհը, որն իրականացվել էր Վլադիմիր Զելենսկու անմիջական հրամանով։ ՌԴ ՊՆ-ի տվյալներով` ուկրաինական ստորաբաժանումները մեծ կորուստներ են կրել։
«Երբ հակառակորդն անսպասելի գրոհ իրականացրեց, մենք առաջադրանք ստացանք ոչնչացնել հենակետը։ Եկանք այնտեղ, անսպասելի մարտ սկսվեց։ Մերոնք հետ չքաշվեցին` մեր խմբավորումը ճնշեց այդ գրոհը, չնայած ճառագայթմանը (ռադիոէլեկտրոնային ազդեցություն-խմբ.) և մեր կողմ եկող հրթիռներին»,- պատմել է շտուրմանը, որի անունը նշված չէ։
Նրա խոսքով` հատուկ գործողություններին ներգրավված Ка-52-ի անձնակազմերը վախ չունեն, հակառակորդի հարվածներից խուսափել նրանց օգնում են մարտերի և զորավարժությունների ժամանակ ձեռք բերած հմտությունները։
«Ընդհանուր առմամբ կարող եմ ասել, որ վաղ առավոտից աշխատում ենք, խնդիր ստանալու դեպքում արագ պատրաստվում ենք։ Օրական 3-5 թռիչք ենք ունենում»,- ասել է շտուրմանը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 187-րդ օրը։