ԵՐԵՎԱՆ, 27 օգոստոսի – Sputnik. Հայաստանի զինված ուժերի գլխավոր շտաբի նվագախումբը փոխգնդապետ Հայկ Գրիգորյանի և դիրիժոր մայոր Արտակ Սիմոնյանի ղեկավարությամբ «Սպասսկայա բաշնյա» զինվորական երաժշտության փառատոնի շրջանակում քայլերթ է կատարել Մոսկվայի ժողովրդական տնտեսության նվաճումների ցուցահանդեսի հարթակում։
Հայաստանի զինված ուժերի գլխավոր շտաբի նվագախմբի անդամները
© Sputnik / Михаил Воскресенский
Զինվորական քայլերթի մասնակիցները «Ժողովուրդների բարեկամության» շատրվանից շարժվել են դեպի Ձիասպորտի ազգային ավանդույթների կենտրոն, որտեղ միջոցառմանը մասնակցող նվագախմբերը ներկայացրել են իրենց կատարումները:
Հայաստանի զինված ուժերի գլխավոր շտաբի նվագախմբի անդամները
© Sputnik / Михаил Воскресенский
Հայաստանի նվագախումբը կատարել է Հայաստանի մայրաքաղաքի հիմնը` Էդգար Հովհաննիսյանի «Էրեբունի-Երևան», և Արամ Խաչատրյանի «Գարուն Երևան» ստեղծագործությունները։
Հայաստանի զինված ուժերի գլխավոր շտաբի նվագախումբը փառատոնի ընթացքում ներկայացնելու է նաև «Ալաշկերտի Քոչարի», ինչպես նաև հատված «Գայանե» բալետից և այլ ստեղծագործություններ։
«Սպասսկայա բաշնյա» փառատոնը մեկնարկել է օգոստոսի 26-ին Մոսկվայի Կարմիր հրապարակում։ Այն շարունակվելու է մինչև սեպտեմբերի 4-ը։
Փառատոնին մասնակցում են նվագախմբեր Բելառուսից, Եգիպտոսից, Հնդկաստանից և Թաիլանդից։