ԵՐԵՎԱՆ, 12 օգոստոսի – Sputnik. Պետական դավաճանության 2 դեպք է բացահայտվել` ՀՀ երկու քաղաքացիները դիմել են Ադրբեջանի նախագահ Իլհամ Ալիևին, որպեսզի քաղաքացիություն ստանան։ Տեղեկությունը հայտնում են ՀՀ գլխավոր դատախազությունից։
Մասնավորապես, 2022թ. օգոստոսի 10-ին ԱԱԾ-ն հաղորդում է ստացել, որ ՀՀ քաղաքացի Վ. Ղ.-ն պետական դավաճանություն է կատարել։ Նա 2017թ. հավաքագրվելով օտարերկրյա պետության հատուկ ծառայությունների կողմից՝ թշնամական գործունեություն իրականացնելու համար օգնություն է ցուցաբերել։ ՀՀ քաղաքացին իր նախաձեռնությամբ կապ է հաստատել Վրաստանում Ադրբեջանի դեսպանության աշխատակիցների հետ և 2022թ. հունիսի 7-ին Բագրատաշենի անցակետով ՀՀ-ից հեռանալուց հետո օգոստոսի 7-ին տեսաուղերձով դիմել է Ադրբեջանի նախագահին՝ հայտարարելով, որ հրաժարվում է ՀՀ քաղաքացիությունից և ցանկանում է ստանալ Ադրբեջանի քաղաքացիություն:
Բացի այդ, 2022թ. օգոստոսի 10-ին ԱԱԾ-ն հաղորդում է ստացել, որ ՀՀ քաղաքացի Ի. Վ.-ն է պետական դավաճանություն կատարել։ Այսպես, ՀՀ քաղաքացի Ի. Վ.-ն, բնակվելով Թուրքիայի Ստամբուլ քաղաքում և հավաքագրվելով օտարերկրյա պետությունների հատուկ ծառայությունների կողմից, 2022թ. ընթացքում «Ֆեյսբուք» սոցցանցում կատարած հրապարակումներում հակահայկական հայտարարություններ է արել։
Նա գովաբանել է ադրբեջանական իշխանություններին, քննադատել պատերազմի ժամանակ հայկական ԶՈւ գործողությունները, ինչպես նաև դիմել Ադրբեջանի նախագահին՝ խնդրել է իրեն շնորհել Ադրբեջանի քաղաքացիություն և հնարավորություն տալ բնակվել ու աշխատել «Ստեփանակերտ քաղաքում՝ Ադրբեջանի իրավազորության ներքո»։
Նշված դեպքերի առթիվ ՀՀ ԱԱԾ քննչական դեպարտամենտում ՀՀ քրեական օրենսգրքի 418-րդ հոդվածի 1-ին մասով (պետական դավաճանություն) և 424-րդ հոդվածի 1-ին մասով (լրտեսություն) նախաձեռնվել է երկու առանձին քրեական վարույթ: