Հայաստանի Սահմանադրության օրվան նվիրված տոնական քայլերթի շրջանակում Հանրապետության հրապարակում ելույթ ունեցավ նաև Հայաստանի զինված ուժերի պատվո պահակային վաշտը։
Զինվորականներն իրենց հմտությունները ցուցադրեցին հանդիսությանը հետևող քաղաքացիներին։
Մինչ այդ տոնական քայլերթի մասնակիցները տարբեր նվագախմբերի կատարումների ուղեկցությամբ, եռագույն դրոշներով, անցել էին մայրաքաղաքի կենտրոնական փողոցներով` Երևանի Ազատության հրապարակից մինչև Հանրապետության հրապարակ։
Տոնական միջոցառումը, կազմակերպիչների խոսքով, աշխարհասփյուռ հայությանը պետական արժեքների շուրջ համախմբելու նպատակ ունի:
Հիշեցնենք` այսօր Հայաստանում նշվում է Սահմանադրության օրը: 1995 թվականի հուլիսի 5-ին Հայոց համազգային շարժում կուսակցության պատրաստած Հիմնական օրենքի նախագիծը դրվեց համազգային հանրաքվեի և հավանության արժանացավ հայ ժողովրդի կողմից: Այն դարձավ անկախ Հայաստանի առաջին սահմանադրությունը, որով էլ մինչ այսօր առաջնորդվում է ՀՀ–ն։
Մայր օրենքի առաջին փոփոխություններն արվեցին 2005 թվականին՝ ՀՀ երկրորդ նախագահ Ռոբերտ Քոչարյանի օրոք։ Փոփոխության անհրաժեշտությունն ի հայտ եկավ այն ժամանակ, երբ 2001 թվականին Հայաստանը Եվրոպայի խորհուրդ մտավ։
2015 թվականի դեկտեմբերի 6-ին` Սերժ Սարգսյանի օրոք, Հայաստանն արդեն փաստացի նոր Սահմանադրություն ընդունեց, որով երկիրը կիսանախագահական կառավարման ձևից անցավ խորհրդարանականի։