ԵՐԵՎԱՆ, 24 հունիսի – Sputnik. Կաշառքի դիմաց ապօրինի վարորդական վկայականներ ստանալու համար մեղադրանք է առաջադրվել 28 անձի։ Տեղեկությունը հայտնում է ՀՀ հակակոռուպցիոն կոմիտեն։
Կոմիտեում քննված բազմադրվագ քրեական գործով հիմնավորվել է, որ շուրջ երեք տասնյակ անձինք կաշառք են տվել ՀՀ ոստիկանության «Ճանապարհային ոստիկանություն» ծառայության պաշտոնատար անձին, դրա դիմաց հանձնել ձևական բնույթ կրող գործնական քննություններ և ստացել վարորդական վկայականներ:
Ներկայացնելով գործի որոշ մանրամասներ` Հակակոռուպցիոն կոմիտեն հայտնում է, որ Սպիտակ քաղաքի բնակիչ Վ. Շ.-ն 2020 թվականի օգոստոսից 2021 թվականի մայիսն ընկած ժամանակահատվածում բազմաթիվ անձանցից ստացել է ընդհանուր 3 010 000 դրամ, որից 1.4 մլն–ը որպես կաշառք տվել է ՀՀ ՃՈ Երևանի հաշվառման-քննական բաժնի տեսուչ Ա. Ս.-ին:
Վ. Շ.-ի օժանդակությամբ ստացած կաշառքի դիմաց ՃՈ տեսուչը քաղաքացիներից ընդունել է ձևական բնույթ կրող քննություններ, կազմել կեղծ արձանագրություններ կաշառք տված անձանց կողմից քննությունները պատշաճ հանձնելու վերաբերյալ, և նրանք, առանց գործնական վարման հմտությունների պատշաճ ստուգման, ստացել են վարորդական վկայականներ:
Կաշառք տալու, կաշառքի միջնորդություն կատարելու, կաշառք տալու փորձի և վարորդական վկայական ապօրինի ձեռք բերելու համար 28 անձի մեղադրանք է առաջադրվել ՀՀ քրեական օրենսգրքի 312-րդ հոդվածի 1-ին մասով, 313-րդ հոդվածի 1-ին մասով, 34-312-րդ հոդվածի 1-ին մասով և 326-րդ հոդվածով: Նրանց նկատմամբ ընտրվել են անազատության մեջ պահելու հետ չկապված խափանման միջոցներ: Բոլոր մեղադրյալները առաջադրված մեղադրանքներում իրենց լիովին մեղավոր են ճանաչել և տվել են խոստովանական ցուցմունքներ:
Ա. Ս.-ի, վերջինիս օժանդակած Վ. Շ.-ի մասով նախաքննությունն ավարտվել է։ Առանձնապես խոշոր չափերով կաշառք ստանալու, պաշտոնեական լիազորությունները չարաշահելու, պաշտոնեական կեղծիք կատարելու մեղադրանքով գործն այժմ դատաքննության փուլում է: