ԵՐԵՎԱՆ, 13 հունիսի – Sputnik. Մետրոպոլիտենի նախկին տնօրենի և նրա հետ փոխկապակցված 5 անձանց ապօրինի ծագում ունեցող գույքը բռնագանձելու 2 հայցադիմումները վարույթ են ընդունվել, տեղեկությունը հայտնում է դատախազությունը։
Այսպես, գլխավոր դատախազության ապօրինի ծագում ունեցող գույքի բռնագանձման վարչությունը 2 հայցադիմումներով պահանջ է ներկայացրել դատարանին մետրոպոլիտենի նախկին տնօրեն Փայլակ Յայլոյանից և նրան փոխկապակցված՝ ընտանիքի անդամ հանդիսացող 5 անձանցից հօգուտ ՀՀ-ի բռնագանձել մի քանի միավոր գույք։
Մասնավորապես, բռնագանձման ենթակա է Երևանի տարբեր հասցեներում գտնվող 7 բնակարանները, Կոտայքի Առինջ համայնքում գտնվող գույքը, իսկ անհնար լինելու դեպքում՝ այդ գույքերի միջին շուկայական արժեքը՝ 702 միլիոն դրամ։ Բացի այդ, հայցադիմումում նշված են նաև Կոտայքի մարզի Ջրվեժ համայնքում գտնվող 2 հողամասերը, Երևանում գտնվող ավտոկայանատեղին, 2 շինությունները, իսկ անհնար լինելու դեպքում՝ այս գույքերի միջին շուկայական արժեք 535 միլիոն դրամը։
Բռնագանձման ենթակա են նաև 3 մեքենաները կամ դրանց արժեքը` 27 միլիոն դրամ, ինչպես նաև 2 ՍՊ ընկերության բաժնեմասերը և 29 միլիոն դրամ` որպես լուծարված ՓԲԸ բաժնեմասի ձեռքբերման գումար։
Հիշեցնենք, որ Յայլոյանն ու նրա ընտանիքի անդամները հրավիրվել են դատախազություն՝ իրենց վերաբերող վարույթի նյութերին ծանոթանալու և դիրքորոշում հայտնելու համար։
Հավելենք, որ 2001-2003թթ․ և 2007-ից մինչև 2019թ․ մայիսի 20-ը մետրոպոլիտենի տնօրենը եղել է Փայլակ Յայլոյանը։ Նա պաշտոնից ազատվել է սեփական դիմումի համաձայն։