ԵՐԵՎԱՆ, 23 մայիսի – Sputnik. Օրեր առաջ Երևանի մետրոպոլիտենում անհնազանդության ակցիա իրականացրած երկու երեխաներին մետրոպոլիտենի աշխատակիցների կողմից խոշտանգելու դեպքով քրգործ է հարուցվել։ Տեղեկությունը ֆեյսբուքյան իր էջում գրել է փաստաբան Միքայել Շխիմյանը։
«Հաղորդում էր ներկայացվել հանցագործության վերաբերյալ, կապված ոստիկանության մետրոպոլիտենի բաժնի աշխատակիցների կողմից 2 անչափահաս երեխաների ծեծի ենթարկելու փաստի կապակցությամբ։ Քննիչի կողմից տրվել էր դատաբժշկի ուղեգիր, ֆիքսվել էին երեխաների կողմից ստացված մարմնական վնասվածքները։ Դեպքով քրգործ է հարուցվել»,- գրել է Շխիմյանը։
Փաստաբանը Sputnik Արմենիայի հետ զրույցում հայտնեց, որ դեպքը տեղի է ունեցել մետրոյի «Բարեկամություն» կայարանում. անհնազանդության խաղաղ ակցիա իրականացնողներից երկուսին մետրոպոլիտենի ոստիկանության բաժնի աշխատակիցներն իրենց բաժին են տարել։
«Երեխաների հեռախոսը վերցրել, անջատել են, իսկ վերջիններս ասել են, թե գիտեն իրենց իրավունքները, որ զանգի, ինչպես նաև փաստաբանի հետ կապ հաստատելու հնարավորություն ունեն։ Ոստիկանը վրդովվել է և ասել, թե ինչ իրավունքների մասին է խոսքը` գալուց առաջ պետք է մտածեին այդ մասին։ Դրանից հետո էլ խոշտանգել են երեխաներին»,- ասաց փաստաբանը։
Հավելենք, որ քրգործ է հարուցվել քրեական օրենսգրքի 309.1-րդ հոդվածի 2-րդ մասի 1-ին, 2-րդ և 4-րդ մասերով, այն է՝ խոշտանգումը, որը կատարվել է մի խումբ անձանց կողմից, երկու կամ ավելի անչափահաս անձանց նկատմամբ։