ԵՐԵՎԱՆ, 26 ապրիլի – Sputnik. Երիտասարդները Երևանի բուհերում իրազեկման ակցիաներ են անցկացնում` «Միացե՛ք» վանկարկումներով կոչ անելով ուսանողներին միանալ ու պայքարել հանուն Արցախի և Հայաստանի։
Երիտասարդների ակցիան այսօր մեկնարկեց Հայաստանի պետական տնտեսագիտական համալսարանի մոտ, այնտեղ Արցախի դրոշ տեղադրեցին, այնուհետև Արցախի մեծ դրոշը պարզած՝ շարժվեցին դեպի Երևանի պետական համալսարան։
Այստեղ ուսանողները պահանջում էին հանդիպում ռեկտոր Հովհաննես Հովհաննիսյանի հետ։ ԵՊՀ մամուլի խոսնակ Ազնիվ Գրիգորյանը հայտնեց, որ ռեկտորը տեղում չէ։
«Միացեք». երիտասարդները Երևանի բուհերում իրազեկման ակցիաներ են անցկացնում (26 ապրիլի, 2022թ). Երևան
© Sputnik / Asatur Yesayants
Ուսանողները բոլոր վայրերում, որտեղ լինում են` փակցնում են Արցախի դրոշով ինքնակպչուն պիտակներ։
«Մենք այս քայլով ցանկանում ենք ասել, որ հայրենիքը մեզ համար սրբություն է, և չի կարելի թուրքի հետ խաղաղության գնալ և խաղաղության դարաշրջան բացել։ Մենք ապրիլի 23-ին ջահերով երթ ենք արել, որ հիշեցնենք ներքին թշնամուն` թուրքը 1915 է կազմակերպել, ու ապացուցենք` չենք մոռանալու ու խաղաղության դարաշրջան չենք բացելու թուրքի հետ»,- ասաց ուսանողներից մեկը։
«Ուսանո՛ղ, զարթնիր», «Հա՛յ ազգ, ոտքի՛», «Արցախ, ոտքի», «Զարթնի՛ր, լաո» վանկարկումներով ուսանողները շարժվեցին դեպի Ֆիզիկական կուլտուրայի և սպորտի ինստիտուտ ու Հյուսիսային համալսարան։
Հիշեցնենք՝ ապրիլի 25-ին մի խումբ երիտասարդներ երևանյան 15 բուհերում միաժամանակ «Ուսանո՛ղ, զարթնի՛ր» կոչով դիմել են ուսանողներին։