Փուլայի՞ն, թե՞ փաթեթային. ԱԺ փոխնախագահը պատասխանեց Սերժ Սարգսյանի գրասենյակին

ԵՐԵՎԱՆ, 14 ապրիլի – Sputnik. ՀՀ երրորդ նախագահ Սերժ Սարգսյանի գրասենյակի` Արցախի հարցի լուծման բանակցային 2016թ-ի փաստաթղթի մի հատվածի հրապարակմանն այսօր ԱԺ նիստում արտահերթ ելույթի իրավունքով արձագանքեց ԱԺ փոխնախագահ, ՔՊ անդամ Ռուբեն Ռուբինյանը։

Աժ փոխխոսնակը հայտարարեց, որ 2016թ-ի փաստաթղթով նկարագրված է եղել միայն մեկ փուլի լուծում` Արցախի 7 շրջանների հանձնումը Ադրբեջանին։

«Արդյո՞ք այդ փաստաթղթով ֆիքսվել է, թե ինչ կարգավիճակ պետք է ունենա Արցախը։ Ո՛չ, չի ֆիքսվել։ Արդյո՞ք այդ փաստաթղթով ֆիքսվել է, թե երբ, որտեղ ու ում մասնակցությամբ պետք է տեղի ունենա հանրաքվե Արցախի վերջնական կարգավիճակի շուրջ։ Ո՛չ, չի ֆիքսվել։ Ֆիքսվե՞լ է, թե ինչպիսի հարց պետք է դրվի այդ հանրաքվեին։ Ո՛չ, չի ֆիքսվել։ Փոխարենը ֆիքսվել է, որ ոչինչ չի ֆիքսվել այդ իմաստով»,- ասաց Ռուբինյանը` հավելելով. «Հետևաբար, Սերժ Սարգսյանը քննարկել է մաքուր փուլային տարբերակ»։

Ըստ նրա, փաստաթուղթը կարելի է կոչել «փուլային» կամ «փաթեթային», բայց դրանից դրա էությունը չի փոխվում։

Հիշեցնենք` ՀՀ երրորդ նախագահ Սերժ Սարգսյանի գրասենյակն այսօր, ի պատասխան ՀՀ վարչապետի ելույթում հնչած տեսակենտների, հրապարակել է 2016թ. օգոստոսին ԵԱՀԿ Մինսկի խմբի կողմից ներկայացված առաջարկությունների փաստաթղթի առաջին երեք պարբերությունները։

Դրանում արձանագրվում է կողմերի պատրաստակամությունը ԼՂ խնդրի խաղաղ կարգավորման, հարցը ՄԱԿ-ի, ԵԱՀԿ-ի փաստաթղթերի ու ԵԱՀԿ ՄԽ համանախագահների ջանքերի շրջանակներում լուծելու վերաբերյալ։

Երրորդ պարբերության մեջ բառացի ասվում է. «Այս հայտարարագիրը հիմնված է փաթեթային պայմանավորվածությունների սկզբունքի վրա։ Դրանում ներառված դրույթները կազմում են մեկ ամբողջություն։ Դրանք չեն կարող իրագործվել միմյանցից անջատ ու պահանջում են վստահելի միջազգային վերահսկողություն` այդ թվում համանախագահ երկրների կողմից»։

Երրորդ նախագահի գրասենյակի հայտարարության մեջ նաև նշվում է, որ իշխող քաղաքական ուժն այս ամենին քաջատեղյակ է, բայց ԼՂ բանակցային գործընթացը միտումնավոր նենգափոխում է ու ձախողում բանակցությունները։