ԵՐԵՎԱՆ, 5 ապրիլի – Sputnik. Հայաստանի և Վրաստանի հարաբերությունների բարձր մակարդակը Հարավային Կովկասի անվտանգության կարևոր գործոններից է։ Նման կարծիք է հայտնել ԱԺ նախագահ Ալեն Սիմոնյանը` Վրաստանի խորհրդարանի նախագահ Շալվա Պապուաշվիլիի գլխավորած պատվիրակության հետ հանդիպման ժամանակ. տեղեկությունը հայտնում է ՀՀ Ազգային ժողովի կայքը` հավելելով, որ Պապուաշվիլիի գլխավորած պատվիրակությունը պաշտոնական երկօրյա այցով Հայաստանում է գտնվում Սիմոնյանի հրավերով։
Ալեն Սիմոնյանը փաստել է, որ մեր երկիրը շահագրգիռ է Վրաստանի հետ հատուկ բարիդրացիական հարաբերությունների հետագա զարգացմամբ: Նա հիշեցրել է, որ այդ դիրքորոշումն արտահայտված է նաև ՀՀ կառավարության 2021-2026թթ. գործողությունների ծրագրում:
«Սիմոնյանը համոզմունք է հայտնել, որ երկու երկրների միջև փոխվստահության, շարունակական երկխոսության և համագործակցության ամրապնդումը կնպաստի տարածաշրջանի անվտանգությանն ու կայունությանը: Նա հրատապ է համարել հումանիտար ճգնաժամի կանխման նպատակով միջազգային հանրության հստակ արձագանքը, ինչպես նաև միջազգային հումանիտար կառույցների անհապաղ և անխոչընդոտ ներգրավվածությունը ԼՂ–ում»,- ասված է հաղորդագրության մեջ:
Միաժամանակ, վրացական «Пирвели архи» հեռուստաալիքը հաղորդում է, որ Պապուաշվիլին ասել է, որ Վրաստանն ու Հայաստանը պետք է ընդլայնեն համագործակցությունը երկու երկրների խորհրդարանների միջև։
«Երկու երկրներն այսօր նշում են դիվանագիտական հարաբերությունների հաստատման 30-ամյակը։ Սակայն այդ թվի հետևում կանգնած է մեր պետությունների և ժողովուրդների միջև բազմադարյա համագործակցությունն ու բարեկամությունը»,- ասել է նա։
Վրաստանի խորհրդարանի ղեկավարի գլխավորած պատվիրակությունն այցի ընթացքում հանդիպումներ է ունենալու վարչապետ Նիկոլ Փաշինյանի, նախագահ Վահագն Խաչատուրյանի և ԱԳ նախարար Արարատ Միրզոյանի հետ:
Նախատեսվում է հանդիպում նաև Ամենայն հայոց կաթողիկոս Գարեգին Երկրորդի հետ: