ԵՐԵՎԱՆ, 5 ապրիլի – Sputnik. ՀՀ երրորդ նախագահ Սերժ Սարգսյանը չի կարծում, որ վաղը Բրյուսելում կայանալիք Փաշինյան-Ալիև հանդիպմանը կհաջողվի Արցախն Ադրբեջանի կազմ մտցնել կամ ՀՀ-ն դարձնել մշտապես խաղաղություն մուրացող երկիր. նա այս մասին ասաց Ազատության հրապարակում լրագրողների հետ զրույցում։
Հայտնել էինք, որ վաղը Բրյուսելում կկայանա ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։ Ընդդիմադիր «Հայաստան» և «Պատիվ ունեմ» խմբակցություններն ապրիլի 5-ին Ազատության հրապարակում հանրահավաք անցկացրին։
«Ակնհայտ է, որ Արցախի շուրջ ստեղծված իրավիճակը շատ մտահոգիչ է, և եթե այդպես չլիներ, հազարավոր մարդիկ այստեղ չէին լինի։ Սակայն չեմ կարծում, որ վաղն ինչ-որ փաստաթուղթ կստորագրվի, չնայած օդում կախված են նման վտանգներ»,- ասաց Սարգսյանը;
Նկատառմանը, թե իշխանությունը մեղադրում է նախկիններին` ասելով, որ 30 տարում ԼՂ հարցն այդպես էլ չլուծեցին, Սարգսյանն արձագանքեց, թե նման կոնֆլիկտները հեշտ չէ լուծել նույնիսկ 50 տարում, և իրենք ինչքան կարողացել են, այդքան մոտեցրել են այդ լուծումը։
Սարգսյանի խոսքով, իրենց մեղավորությունը չէ, որ իշխանության եկան մարդիկ, որոնք հայտարարեցին, թե նոր կետից են սկսում ամեն ինչ։
Իսկ մեկ այլ հարցի, թե իշխանություններն ասում են, որ Սարգսյանը միշտ բանակցել է հանձնելու համար, պատասխանեց` ղալաթ են անում.
«Ես երբեք հանձնելու մասին չեմ բանակցել, այլ բանակցել եմ, թե ինչ ենք ստանալու»,- ասաց ՀՀ երրորդ նախագահը։
ՀՀ կառավարության վերջին նիստին Փաշինյանը հույս էր հայտնել, որ հանդիպմանն Ադրբեջանի նախագահի հետ կքննարկեն և կհամաձայնեցնեն խաղաղության բանակցությունների մեկնարկի հետ կապված բոլոր հարցերը։