Քոչարյանի և Սարգսյանի հանդեպ միջազգային հետախուզում չի հայտարարվել. Գլխավոր դատախազություն

ԵՐԵՎԱՆ, 4 մարտի – Sputnik. ՀՀ երկրորդ նախագահ Ռոբերտ Քոչարյանի և երրոդ նախագահ Սերժ Սարգսյանի նկատմամբ միջազգային հետախուզում հայտարարված չէ և չի կարող հայտարարվել։ 168.am-ի գրավոր հարցման ի պատասխան տեղեկությունը հայտնել են ՀՀ գլխավոր դատախազությունից։

Փետրվարի 21-ին ադրբեջանական Minval.az-ը հաղորդեց, որ Ադրբեջանը հետախուզում է հայտարարել ՀՀ երկրորդ և երրորդ նախագահներ Ռոբերտ Քոչարյանի և Սերժ Սարգսյանի նկատմամբ։ Կայքը հղում էր կատարել Ադրբեջանի ռազմական դատախազության հատուկ հետաքննությունների բաժնի ղեկավար Էմիլ Թաղիևին։

ՀՀ գլխավոր դատախազությունից 168.am-ին տեղեկացրել են, որ դեռևս 2017թ.-ից դատախազությունը ՀՀ իրավասու մարմինների ու օտարերկրյա գործընկերների հետ արդյունավետ համագործակցության արդյունքում միջոցներ է ձեռնարկել Ադրբեջանի կողմից քաղաքական շարժառիթներով և ազգային պատկանելիության հիմքով նախաձեռնված հետախուզման հարցումների փորձերը կանխելու և ձախողելու ուղղությամբ։

Նման փորձերի վերաբերյալ տեղեկություն ստացվելու յուրաքանչյուր դեպքում ՀՀ դատախազության կողմից կատարվում են համապատասխան ստուգումներ ու ձեռնարկվում միջոցներ` դրանք ձախողելու ուղղությամբ։

Նման խնդիրների լուծման ուղղությամբ «Ինտերպոլի» գլխավոր քարտուղարության հետ իրականացվող աշխատանքների արդյունքում Ադրբեջանի կողմից միջազգային հետախուզում հայտարարելու փորձերի կապակցությամբ «Ինտերպոլի» գլխավոր քարտուղարության կողմից ձևավորվել է դիրքորոշում՝ նմանատիպ որևէ հարցման «Ինտերպոլի» գլխավոր քարտուղարության կողմից ընթացք չի տրվում:

Ինչ վերաբերում է ՀՀ քննչական մարմիններում քննվող քրգործերով ադրբեջանական ռազմաքաղաքական ղեկավարության ներկայացուցիչների դեմ հարուցված քրեական գործերի առկայության վերաբերյալ հարցադրումներին, ապա ՀՀ դատախազությունից տեղեկացրել են, որ այդպիսիք հարուցված են։ Դրանց շրջանակներում մի շարք բարձրաստիճան պաշտոնատար անձանց նկատմամբ քրեական հետապնդում է իրականացվում:

Մանրամասները` սկզբնաղբյուրում։