ՌԴ պաշտպանության նախարարությունը հայտնում է, որ ռուս խաղաղապահ զորախմբի զինծառայողները ոչնչացրել են համազարկային կրակի ռեակտիվ համակարգի զինամթերքը, որը հայտնաբերվել է Լեռնային Ղարաբաղի Ասկերանի շրջանում:
Վտանգավոր գտածոն հայտնաբերվել է Ասկերանի շրջանի բնակչի կողմից հողագործության ժամանակ։ Ռազմամթերքի ականազերծման խմբի մասնագետները դասակարգել են այն որպես 300 մմ ռեակտիվ արկ։
Քանի որ արկը հնարավոր չէր տեղափոխել, որոշում է կայացվել այն տեղում ոչնչացնելու մասին՝ բոլոր անվտանգության միջոցառումների պահպանմամբ:
«Ականազերծման խմբի կողմից ոչնչացվել է համազարկային կրակի ռեակտիվ համակարգի չպայթած արկ։ Հայտը եկել է Ասկերանի շրջանի ղեկավարությունից՝ գյուղատնտեսական աշխատանքների անվտանգ անցկացման նպատակով»,– ասել է ռուս խաղաղապահ զորախմբի ներկայացուցիչ Պյոտր Պարշիկովը:
Ընդհանուր առմամբ` 2020 թվականի նոյեմբերի 23-ից ռուս խաղաղապահ զորախմբի ինժեներա-սակրավորական ջոկատների կողմից չպայթած զինամթերքից մաքրվել է 2322,1 հա տարածք, 683 կմ ճանապարհ, 1937 շենք, հայտնաբերվել ու վնասազերծվել է 26078 պայթուցիկ առարկա:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: