«ՀՀ-ն ավելի գրավիչ երկիր կդառնա, եթե․․․». Փաշինյանը Գյումրիում է

ԵՐԵՎԱՆ, 4 հունվարի – Sputnik. ՀՀ վարչապետ Նիկոլ Փաշինյանը Գյումրիում մասնակցել է Հայաստանի մաքսային ծառայության 30-ամյակին նվիրված միջոցառմանը: Տեղեկությունը հայտնում է վարչապետի մամուլի ծառայությունը։

Փաշինյանը շնորհավորել է մաքսային ծառայության աշխատողներին ծառայության 30-ամյակի կապակցությամբ:

Նրա խոսքով՝ Մաքսային ծառայությունը պետության կարևորագույն ատրիբուտներից մեկն է և պետք է շարունակել վերջին տարիներին սկսած փոփոխության գործընթացը:

Նա հույս է հայտնել, որ տարածաշրջանային փոփոխությունների և զարգացումների բերումով` Մաքսային ծառայության բարելավումը Հայաստանն ավելի գրավիչ երկիր կդարձնի։

«Եվ սրա համար ոչ միայն ճանապարհները, կոմունիկացիաներն են կարևոր, այլև այն ծառայությունները, որ մատուցվում են, մասնավորապես, Մաքսային ծառայության կողմից»,-ասել է վարչապետը:

Միջոցառման ընթացքում վարչապետին ներկայացվել է Հայաստանի մաքսային համակարգի ստեղծման, կայացման և զարգացման գործընթացը: Նշվել է, որ արդիականացվել են Բագրատաշեն, Գոգավան և Բավրա անցման կետերը:

Գյումրի քաղաքում կառուցվել է Հյուսիսային արտաքին տնտեսական գործունեության սպասարկման կենտրոն: Կենտրոնում իրականացվում է մարդատար ավտոմեքենաների մաքսային ձևակերպումների գործընթացը՝ ամբողջովին արդիականացված հնարավորություններով ու նոր աշխատաոճով:

Գործընթացն իրականացվել է ՀՀ վարչապետի՝ ավտոմեքենաների մաքսային ձևակերպման գործառույթը Գյումրի տեղափոխելու վերաբերյալ հանձնարարության հիման վրա։ Արդիականացման իր հերթին է սպասում նաև երկրի հարավային սահմանը՝ Մեղրիի սահմանային անցակետը։

Միջոցառման ընթացքում տեղի է ունեցել նաև Մաքսային ծառայության աշխատակիցների պարգևատրման արարողություն: