ԵՐԵՎԱՆ, 25 դեկտեմբերի – Sputnik. Երևանի նախկին քաղաքապետ Հայկ Մարությանը դիմում է ներկայացրել, որպեսզի իր` Երևանի ավագանու անդամի լիազորությունները դադարեցվեն։
Քաղաքապետի պաշտոնը ստանձնելու երդման արարողության ավարտից հետո լրագրողների հետ զրույցում այս մասին հայտարարեց Երևանի նորընտիր քաղաքապետ Հրաչյա Սարգսյանը։
«Հայկ Մարությանը, ինչքանով ես եմ տեղյակ, դիմում է ներկայացրել, որպեսզի իր լիազորությունները դադարեն»,–ասաց Սարգսյանը։
Նշենք, որ չնայած Հայկ Մարությանի լիազորությունները դադարեցվել էին որպես Երևանի քաղաքապետ, սակայն նա մինչ օրս շարունակում էր ընդգրկված մնալ ավագանու կազմում։
Հարցին, թե Մարությանը հրաժարվել էր ծառայողական մեքենայից, անվտանգության աշխատակիցներից ու պարգևավճարներից, արդյո՞ք նույնն էլ Սարգսյանն է պատրաստվում անել` վերջինս պատասխանեց, որ, ցավոք, ինքը վարել չգիտի, եթե ժամանակ ունենա, կփորձի սովորել։
«Իմ եկամտի միակ աղբյուրն աշխատավարձն է։ Պարգևավճարներ աշխատավարձի բարձրացումից հետո չեմ ստացել, այսինքն` գուցե տարբեր հանձնարարականներ կամ հավելյալ ջանք իրականացնելու հատուկենտ դեպքերում եղել են։ Իսկ ինչ վերաբերում է անվտանգության աշխատակիցներին, ապա նրանց կարիքը չունեմ»,–ասաց Սարգսյանը։
Հիշեցնենք` դեկտեմբերի 22-ին Երևանի ավագանին արտահերթ նիստ հրավիրեց և անվստահություն հայտնեց Հայկ Մարությանին, որը քաղաքապետ էր ընտրվել 2018թ. սեպտեմբերի 23-ին կայացած Երևանի ավագանու ընտրությունների արդյունքներով` «Իմ քայլը» դաշինքի առաջին համարի ներքո։
Մարությանը կուսակցությունից հեռանալու դիմում է ներկայացրել 2020թ.–ին։