ԵՐԵՎԱՆ, 21 դեկտեմբերի – Sputnik. Երևանի մետրոպոլիտենի շարժակազմը համալրվել է ամբողջությամբ հիմնանորոգված և արդիականացված 3 վագոնով։ Տեղեկությունը հայտնում է Երևանի քաղաքապետարանի մամուլի ծառայությունը։
Նշվում է, որ քաղաքապետ Հայկ Մարությանը ծանոթացել է շարժակազմի հարմարություններին։
«Նոր շարժակազմի գիծ դուրս գալով՝ գլխավոր գծում արդեն կաշխատի 12 շարժակազմ։ Այսպիսով՝ վագոնային հավաքակայանում մետրոպոլիտենն ունենում է 3 վագոնից բաղկացած 3 շարժակազմ, որն էականորեն կթեթևացնի ուղևորների հարմարավետ տեղափոխումը»,– նշում են քաղաքապետարանից։
Շարժակազմի արդիականացումն ու հիմնանորոգումն իրականացվել է բացառապես մետրոպոլիտենի տնտեսած միջոցների հաշվին։
Մետրոպոլիտենը ներկայում ընդհանուր առմամբ ունի ավելի քան 12,1 կմ-ոց շահագործվող գիծ, 10 կայարան, վագոնային հավաքակայանում առկա է 45 վագոն, որից շահագործվում է 33-ը։
Տարեկան մետրոն տեղափոխում է ավելի քան 20 մլն ուղևոր: