ԵՐԵՎԱՆ, 16 նոյեմբերի – Sputnik. ԿԳՄՍ նախարար Վահրամ Դումանյանը կարծում է, որ Երևանի քաղաքապետարանի և ԿԳՄՍ նախարարության միջև դպրոցների բաժանումը կառավարչական առումով արհեստական է։ Այդ մասին Դումանյանը հայտնեց կառավարության նիստից հետո լրագրողների հետ զրույցում։
Հարցին, թե ինչպե՞ս է գնահատում Երևանի քաղաքապետարանի կրթության վարչության բաժնի աշխատանքը` նախարարը պատասխանեց, որ նախարարության և վերոհիշյալ կառույցի միջև համագործակցային մթնոլորտ է։
«Քաղաքապետարանի կրթության վարչության բաժնի հետ մենք անընդհատ կապի մեջ ենք։ Գիտեք, որ հիմա հիմնական դպրոցները համակարգվում են քաղաքապետարանի կողմից, ավագները` նախարարության։ Կարծում եմ, որ կառավարչական առումով նման բաժանումն արհեստական է, սակայն դա քաղաքապետարանի հիմնախնդիրը չէ, այլ ընդհանուր խնդիր է»,–ասաց Դումանյանը։
Նրա խոսքով` չկա մի կողմ, որի պատճառով նման «ժառանգություն» է մնացել։ Նախարարը հայտնեց` շուտով կունենանք միասնական կառավարման համակարգ։ Դումանյանը հավելեց, որ քաղաքապետարանի կրթության վարչությունը որևէ կոնֆլիկտային խնդիրներ չունի իրենց հետ` փոխլրացմամբ աշխատանքներ են տարվում։
Իսկ հարցին, թե ինչպե՞ս է վերաբերվում ավագանու «Իմ քայլը» խմբակցության կողմից Երևանի քաղաքապետ Հայկ Մարությանին անվստահություն հայտնելու գործընթացին` Դումանյանը պատասխանեց, որ նոր է իմանում այդ մասին, ուստի կարծիք հայտնել չի կարող։
Հիշեցնենք` Երևանի ավագանու «Իմ քայլը» խմբակցությունը քաղաքապետ Հայկ Մարությանին անվստահություն հայտնելու գործընթաց է սկսել: Նախնական տվյալներով` 39 ստորագրություն արդեն կա։ Գործընթաց սկսելու համար 33 ստորագրություն է անհրաժեշտ։