ԵՐԵՎԱՆ, 10 դեկտեմբերի – Sputnik. ՀՀ տարածքային կառավարման և ենթակառուցվածքների նախարար Գնել Սանոսյանն հյուրընկալել է Իրանի Իսլամական Հանրապետության մաքսային ծառայության ղեկավար Մեհդի Միրաշրաֆիի գլխավորած պատվիրակությանը: Տեղեկությունը հայտնում է գերատեսչության մամուլի ծառայությունը։
Հանդիպման ընթացքում Սանոսյանը բարձր է գնահատել բարեկամ Իրանի հետ բազմաշերտ համագործակցությունը և ընդգծել, որ երկու երկրները զարգացման մեծ պոտենցիալ ունեն ուղևորաշրջանառության և բեռնաշրջանառության ոլորտում։
Քննարկվել են Սյունիքում այլընտրանքային ճանապարհի հետ կապված, բեռնափոխադրումների արագ սպասարկումը խթանելու նպատակով մաքսային ընթացակարգերի դյուրացմանը վերաբերող, ինչպես նաև ճանապարհային վճարների հետ կապված հարցեր։
Նախարարը տեղեկացրել է, որ այժմ օրենսդրական փոփոխություններ են նախաձեռնվում, որով նախատեսվում է ճանապարհային վճարը վերափոխել կիլոմետրի դիմաց վճարի։ Սանոսյանն ասել է նաև, որ առաջիկայում պատրաստ կլինի Տաթև-Լծեն ավտոճանապարհը, որով նախ կկրճատվի դեպի Երևան ճանապարհը, ինչպես նաև դրանով կլուծվի այլընտրանքային ճանապարհի դժվարանցանելի հատվածների խնդիրը։
Մեհդի Միրաշրաֆին իր հերթին ընդգծել է, որ Հայաստանի և Իրանի միջև տարանցման ու ապրանքափոխանակման շատ ավելի մեծ պոտենցիալ է առկա, որը միանշանակ պետք է օգտագործել և խթանել ներդրումները։ Նրա խոսքով` պետք է համատեղ ծրագրավորված աշխատել, զարգացնել ենթակառուցվածքները, որպեսզի հնարավոր լինի խորացնել առկա համագործակցությունը։
Նշենք, որ Միրաշրաֆին Հայաստան է եկել աշխատանքային այցով դեկտեմբերի 8-ին։ Նրան դիմավորել է ՀՀ պետական եկամուտների կոմիտեի նախագահ Ռուստամ Բադասյանը։