ԵՐԵՎԱՆ, 6 դեկտեմբերի – Sputnik. Երևանում սանիտարահիգիենիկ նորմերի կոպիտ խախտումների հայտնաբերման պատճառով կասեցվել է «Անամել» ՍՊԸ-ին պատկանող հացի արտադրամասի գործունեությունը։ Տեղեկությունը հայտնում է ՀՀ սննդամթերքի և անվտանգության տեսչական մարմինը։
Ըստ հաղորդագրության` խախտումները հայտնաբերել են Երևանի կենտրոնի տեսուչները։
«Պարզվել է, որ արտադրական, օժանդակ և կենցաղային շենքերն ունեն վերանորոգման կարիք, արտադրամասում ապահովված չէ պաշտպանությունը խաչաձև աղտոտումից, բոլոր սարքավորումները, գործիքները, պարագաները և բեռնարկղերը, որոնք անմիջական շփման մեջ են գտնվում սննդամթերքի հետ, չեն ենթարկվում պատշաճ մաքրման ու ախտահանման»,– նշում են ՍԱՏՄ–ից։
Պարզվել է, որ կենցաղային հատվածները նույնպես չեն համապատասխանում հիգիենայի պահանջներին, աղբի հավաքման համար տեղադրված չեն անջրաթափանց, կափարիչներով փակվող կուտակիչ տարողություններ:
Հայտնաբերված խախտումները վերացնելու համար ժամկետ է սահմանվել։