ԵՐԵՎԱՆ, 2 դեկտեմբերի – Sputnik. Կառուցապատման թույլտվությունների ստացման գործընթացում անցում կկատարվի բացառապես առցանց դիմելու և տրամադրման համակարգի։ Նման որոշում կայացվեց այսօրվա կառավարության նիստի ժամանակ։
Քաղաքաշինության կոմիտեի նախագահ Արմեն Ղուլարյանը հայտնեց, որ մինչև 2024-ի տարեվերջ քաղաքաշինական թույլտվությունների գործընթացն ամբողջապես իրականացվելու է առցանց համակարգի միջոցով։
«Նախատեսվում է նաև զգալիորեն կրճատել քաղաքաշինական թույլտվությունների տրամադրման փուլերը և պահպանել դրանց տրամադրման ժամկետները։ Առաջարկվում է վերանայել թույլտվության տրամադրման գործողությունների շրջանակը։ Արդյունքում շատ մեծ ժամանակ կխնայվի»,–ասաց Ղուլարյանը։
Նրա խոսքով` առաջին փուլում նախատեսվում է 2022 հունվարի 1-ից Կոտայքի մարզի Եղվարդ, Արմավիրի մարզի Էջմիածին, Արարատի մարզի Մասիս և Լոռու մարզի Վանաձոր համայնքներում կառուցապատման թույլտվությունների ստացման մեծ մասն իրականացնել էլեկտրոնային եղանակով:
Ղուլարյանը հավելեց, որ քաղաքացին առցանց կարող է հետևել իր դիմումի ընթացքին։