ԵՐԵՎԱՆ, 30 նոյեմբերի – Sputnik. «Տարվա 10 լավագույն մարզիկներ» մրցույթն այս տարի կանցկացվի այլ ձևաչափով։ Մարզիկներին ընտրելու հնարավորություն կունենան նաև լրագրողները։ Տեղեկությունը լրագրողների հետ զրույցում հայտնեց ԿԳՄՍ փոխնախարար Կարեն Գիլոյանը։
Նրա խոսքով`Հայաստանի 10 լավագույն մարզիկներին կընտրեն Հայաստանի հավաքականների գլխավոր մարզիչներն ու սպորտ լուսաբանող լրատվամիջոցներից 1–ական լրագրողներ։
Այս անգամ լավագույն մարզիկ չի որոշվելու, այլ լավագույն տասնյակ։ Ցուցակը կկազմվի այբբենական կարգով։ sms քվեարկությունը կպահպանվի, սակայն հանրությունը կարող է ընտրել միայն մեկ մարզիկի, որը կշահի «Հանդիսատեսի համակրանք» մրցանակը։ Յուրաքանչյուր մարզասեր իր հեռախոսից կարող է քվեարկել մեկ անգամ։
Նշենք, որ «Հանդիսատեսի համակրանք» մրցանակի դափնեկիրը պետք է լինի հայ, բայց կարող է ապրել աշխարհի ցանկացած երկրում, Հայաստանը ներկայացնել այլ պետություններում կամ հանդես գալ այլ երկրի դրոշի ներքո։ Նրա մրցանակը նույնն է լինելու, ինչ լավագույն 10 մարզիկներինը, բայց մի տարբերությամբ, որ նա չի ընդգրկվի լավագույն տասնյակում և նրա մարզիչն ու բժիշկը չեն պարգևատրվի։
«Այս տարի Հայաստանի 10 լավագույն մարզիկները, Հայաստանի հավաքականի գլխավոր մարզիչները, մարզիկների անձնական մարզիչները և բժիշկները կամ մերսողները կստանան դրամական պարգև։ ՀՀ կառավարությունը սահմանել է 50 մլն դրամ մրցանակային ֆոնդ»,–ասաց Գիլոյանը։
Նախնական տվյալներով` մրցույթի արդյունքները կամփոփովեն դեկտեմբերի 21–ին։
Նշենք, որ մրցույթն առաջին անգամ անցկացվել է 2019 թվականին։ Նախորդ տարի այն չի անցկացվել երկրում կորոնավիրուսային համավակի և արցախյան պատերազմի պատճառով։