Եթե ԲԴԽ պաշտոնակատար Գագիկ Ջհանգիրյանը ու արդարադատության նախարար Կարեն Անդրեասյանը հրաժարվեն ԱԺ գնալ և պատասխանել ընդդիմադիր ուժերի` դատական համակարգին վերաբերող հարցերին, կնշանակի, որ նրանք ևս, ինչպես օրվա իշխանությունը և արդար դատարանները որևէ հատման կետ չունեն։ Sputnik Արմենիայի հետ զրույցում նման կարծիք հայտնեց փաստաբան Արամ Օրբելյանը։
Իսկ Գագիկ Ջհանգիրյանը ու Կարեն Անդրեասյանին ԱԺ գալու գրություններ են ուղարկել ԱԺ –ում ստեղծված իրավական հարցերով քննիչ հանձնաժողովում ներգրավված ընդդիմադիր խմբակցությունների պատգամավորները։ Նրանք պահանջում են, որ ԲԴԽ ղեկավարն ու արդարադատության նախարարը երկրի թիվ մեկ ամբիոնից պատասխանեն, օրինակ, թե ինչո՞ւ է խաթարվել դեռևս 2013-14 թթ. ներդրված ` պատահականության սկզբունքով դատական գործերի մակագրման համակարգը։ Կամ պատասխանեն` ինչո՞ւ են քաղաքական հնչեղություն ունեցող գործերը մակագրվում կոնկրետ դատավորների։
«ՔՊ-ն ցանկանում է բացառապես իրեն ենթարկվող դատարաններ, և ինքն ընկալում է պետական կառավարման համակարգը բացառապես անձնակենտրոն, խորհրդային կարգերի ներքո։ Եթե իշխող ուժը չմասնակցի հանձնաժողովի նիստներին`տորպեդահարելով դրա աշխատանքները, իսկ պատասխանատու անձինք չներկայանան ԱԺ, բոլորը կհասկանան, որ նրանք չեն ցանկանում աջակցել գործընթացներին` դրանից բխող հետևանքներով»,- ասաց նա։
Հասկանալու դեպքում, ըստ Օրբելյանի, ճիշտ է` դատական համակարգում առկա խնդիրները չեն լուծվի, բայց ժողովուրդը հաջորդ ընտրությունների ժամանակ արդեն մի լավ ծանրութեթև կանի` ուզում է ընտրել կամ վերընտրել մի իշխանության, որի նպատակը իշխանություններին ծառայող և արդարադատության հետ աղերս չունեցող դատարաններ ունենալն է։
«Իշխող քաղաքական ուժն ուզում է դատական համակարգը ծառայեցնել իր շահերի համար` սեփականության վերաբաշխում, քաղաքական օպոնենտների վերաբաշխում, մարդկանց տուգանում և մի շարք այլ գործընթացներ, այսինքն` ոչ թե ուզում է ունենալ արդար կամ ավելի արդար դատական համակարգ, այլ ենթարկվող, ստրկական դատարաններ։ Վարչապետի ասած` ով է այն դատավորը, որն իմ ասածը չանի, ընդ որում, երբ ինքը դա ասի` որևէ մեկը չարձագանքի»,- նշեց Օրբելյանը։
Նշենք, որ ընդդիմադիր խմբակցությունների նախաձեռնությամբ ԱԺ-ում ստեղծվել է իրավական հարցերով քննիչ հանձնաժողով, որը նպատակ ունի վերհանել դատական համակարգում առկա խնդիրները։