ԵՐԵՎԱՆ, 23 նոյեմբերի – Sputnik. Ազատագրական շարժման ներկայացուցիչները, շրջելով Երևանի տարբեր բուհերով, այժմ շարունակում են իրենց բողոքի ակցիան Հանրապետության հրապարակում։
Մասնակիցները դեռ նոյեմբերի 22-ից են սկսել իրենց ակցիաները և պահանջում են կառավարությանը գաղտնազերծել դեկտեմբերի 15–ին ստորագրվելիք փաստաթղթի բովանդակությունը և ադրբեջանական կողմին միջանցք կամ տարածքներ չտրամադրել։
«Մենք արդեն նոր պահանջ ունենք։ Այսօր տեսանք, որ պաշտոնապես խնդրեցին ՌԴ–ին, որպեսզի նրանք միջնորդեն` առանց նախապայմանների հաշտություն կնքվի թուրքերի հետ։ Պետք է հասկանանք, թե ինչ նախապայմաններին մասին է խոսքը` մեր հայրենիքի կորո՞ւստն եք արձանագրելու, հայրենիքի մեջ մտնելո՞ւ է Արցախը։ Պահանջում ենք պարոն վարչապետ` «լայվի» փոխարեն դուրս եկեք, կանգնեք ժողովրդի մեջ առանց ոստիկանների և պատասխանեք մեր հարցերին»,– նշեց «5165» շարժման առաջնորդ Կարին Տոնոյանը։
Նա ընդգծեց, որ թույլ չի տա որևէ մեկին բանակցել իր որդու արյամբ պահած թեկուզ մեկ կտոր հողի համար։ Կոչ արեց բոլորին` գիտնականին ու գյուղացուն, ուսուցչին ու ուսանողին, շինարարին ու բժշկին, որպեսզի բոլորը դուրս գան փողոց ու պայքարեն իրենց տան հողի համար։
Տոնոյանը շեշտեց, որ տարածքներին վերաբերող ցանկացած հարց պետք է հանրաքվեով անցնի, սա սահմանադրությամբ մեր իրավունքն է, հետևաբար պետք է բացվի այդ փաստաթուղթը։ Շարժման մասնակիցները հայտարարեցին, որ պայքարելու են հանուն պետականության։
«Ազատ կամք» նախաձեռնության անդամ, փաստաբան Արա Զոհրաբյանն իր ելույթում շեշտեց, որ իրենք 3 պահանջն ունեն։
«Պետք է կանխել սահմանագծման և սահմանազատման հակահայկական ծրագիրը, այդ թվում հրապարակել ստորագրման ներկայացված փաստաթղթերը, թույլ չտալ միջանցք տրամադրել թշնամուն, ինչպես նաև պահանջում ենք, որպեսզի ՀՀ իշխանությունները լիարժեք զինեն առաջնագիծն ու պաշտպանեն մեր երկրի տարածքային ամբողջականությունը»,– ասաց Զոհրաբյանը։
Ակցիայի ընթացքում, դիմելով Նիկոլ Փաշինյանին, սկսեցին վանկարկել` «դուրս արի» և նկատեցին, որ այդ բառակապակցությունը երկիմաստ է ու շարունակեցին պնդել 2 իմաստով էլ։
Տնտեսագետ Թաթուլ Մանասերյանն էլ հայտարարեց, որ Արկատի Տեր–Թադևոսյանի (Կոմանդես) կողմից հիմնադրած «Քաղաքացիական խորհուրդ» ՀԿ–ն, որն իր մեջ մի քանի հասարակական կառույց է միավորում, միանում է Ազատագրական շարժմանը։
Ազատագրական շարժման անդամները նաև 1 րոպե լռությամբ հարգեցին նոյեմբերի 22-ին Գեղարքունիքի մարզի Նորաբակ գյուղի հատվածում տեղակայված դիրքերում հակառակորդի կրակոցից զոհված ժամկետային զինծառայող Սուրեն Սաֆարյանի հիշատակը։ Հանրահավաքը շարունակվեց երթով։ Երթը պատրաստվում են իրականացնել` շարժվելով Ամիրյան–Մաշտոցի պողոտա–Սայաթ–Նովա–Աբովյան երթուղով և կրկին վերադառնալ Հանրապետության հրապարակ։ Այդ ընթացքում նրանք ժամանակ են տալիս ՀՀ վարչապետ Նիկոլ Փաշինյանին, որպեսզի նա գա ու պատասխանի իրենց հարցերին։
«Վստահ եմ, որ նա այստեղ չի լինելու, մենք կհամարենք արհամարհանք մեր նկատմամբ, իսկ վաղվանից էլ մենք մեր արհամարհանքը ցույց կտանք նրանց նկատմամբ»,– ասաց Արա Զոհրաբյանը։
Կազմակերպիչները նաև տեղեկացրին, որ նոյեմբերի 24-ից հանրահավաքները կիրականացնեն ժամը 18։30-ից։
Հիշեցնենք, որ նոյեմբերի 22-ին, վաղ առավոտից մի շարք ուժեր բողոքի ակցիաներ էին իրականացնում Երևանի Տիգրան Մեծ, Բաղրամյան, Արշակունյաց, Մյասնիկյան պողոտաներում։ Ժամը 17։00–ին նրանք միասնական հանրահավաք իրականացրին Հանրապետության հրապարակում։
Նոյեմբերի 18-иն Փաշինյանը հայտարարել է, որ Ռուսաստանի պաշտպանության նախարարությունը հանդես է եկել հայ-ադրբեջանական սահմանի դելիմիտացիայի ու դեմարկացիայի նախապատրաստական փուլի վերաբերյալ առաջարկություններով, որոնք վարչապետի խոսքով «ընդունելի են Հայաստանի համար»։
Նոյեմբերի 20–ին նաև պարզ դարձավ, որ Երևանը համաձայնություն է տվել դեկտեմբերի 15-ին Բրյուսելում Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպման անցկացմանը:
Նոյեմբերի 23-ին էլ Կրեմլը հաստատեց, որ նոյեմբերի 26-ին Սոչիում կկայանա Պուտին–Փաշինյան–Ալիև եռակողմ հանդիպումը, որն ընթանալու է ՌԴ ղեկավարի նախաձեռնությամբ։