ԵՐԵՎԱՆ, 17 նոյեմբերի – Sputnik. Երևանում Ռուսական տանը ոստիկանների համար ռուսաց լեզվի անվճար դասընթացներ են մեկնարկել, որոնք կազմակերպում է Հայաստանում Ռոսսոտրուդնիչեստվոյի ներկայացուցչությունը։ Տեղեկությունը հայտնում է Ռուսական տան մամուլի ծառայությունը։
Երևանում դասընթացներին մասնակցում են ՀՀ ոստիկանության տարբեր բաժինների և ծառայությունների 16 աշխատակից։ Կորպորատիվ դասընթացներն անցկացվում են «Պրոֆեսիոնալ» ծրագրով, որոնք ավելի կխորացնեն լեզվական գիտելիքները: Դասընթացը վարելու է Երևանում Ռուսական տան գիտական, կրթական և հումանիտար նախագծերի բաժնի գիտամեթոդական ծրագրերի համակարգման առաջատար մասնագետ, մանկավարժական գիտությունների թեկնածու, դոցենտ Սվետլանա Սամուելյանը։
«Ռուսաց լեզվի իմացության խորացմամբ մեր ոստիկանները, անշուշտ, կբարելավեն ծառայության որակը և կամրապնդեն իրենց անձնական ինտելեկտուալ ներուժը»,- ասել է Սամուելյանը՝ ընդգծելով, որ դասընթացի ընթացքում դասընթացի մասնակիցները կզարգացնեն ոչ միայն գրավոր, այլև բանավոր խոսքը։
ՀՀ ոստիկանության շտաբի միջազգային համագործակցության վարչության ԱՊՀ մասնակից երկրների հետ համագործակցության բաժնի հատուկ կարևոր հանձնարարություններով ավագ տեսուչ Դիանա Եդիգարյանը նշել է, որ մեծ ուրախությամբ է գրանցվել Ռուսական տանն անցկացվող դասընթացներին:
«Ոստիկանության աշխատակիցներին իրոք պետք է տիրապետել ռուսերենին, ազատ շփվել այդ լեզվով, քանի որ շատ հաճախ մենք գործ ունենք օտարերկրյա քաղաքացիների, զբոսաշրջիկների հետ»,– ընդգծել է Եդիգարյանը:
Ռուսաց լեզվի դասընթացներին մասնակցելու է նաև ՀՀ ոստիկանության հասարակական անվտանգության ապահովման գլխավոր վարչության համայնքային ոստիկանության համակարգման բաժնի հատկապես կարևոր հանձնարարություններով ավագ տեսուչ, ոստիկանության փոխգնդապետ Խաչիկ Ասատրյանը: Նա ևս նշել է, որ ռուսերենի խորացված ուսումնասիրությունը կարևոր է ոչ միայն մասնագիտության կատարելագործման, այլև անձնական աճի տեսանկյունից:
Դասընթացների տևողությունը 3 ամիս է, լսարանային պարապմունքներն անցկացվելու են շաբաթական 2 անգամ 80 րոպե տևողությամբ։ Դասընթացի ծավալը 72 ժամ է, լինելու են լսարանային դասեր, ինչպես նաև ինքնուրույն աշխատանքներ։ Դասընթացի ավարտին մասնակիցները պետք է վերջնական թեստ հանձնեն, ինչից հետո կստանան վկայականներ։
Նշենք, որ օգոստոսի 30-ին Կապանում մեկնարկել են ռուսաց լեզվի անվճար դասընթացներ նաև ՀՀ Սյունիքի մարզի ոստիկանության աշխատակիցների համար։ Գյումրիում դասընթացները մեկնարկել են այս տարվա սեպտեմբերին։