Սյունիքի մարզի Անգեղակոթ գյուղի բնակիչները վստահեցնում են, որ իրենց մոտ թշնամին երբեք չի եղել, իրենց գյուղն անառիկ է։
Sputnik Արմենիայի թղթակցի հետ զրույցում անգեղակոթցի Նարդոս Հարությունյանը վստահեցնում է, որ թուրքը երբեք իրենց գյուղ չի մտել ու չի էլ կարող։
«Անգեղակոթը սարի պես գյուղ ա, երբեք չի ընկել։ Մեր գյուղը երբեք թուրք չի մտել, չի էլ մտնի։ Երբ ասում եք անգեղակոթցի, նշանակում է` թուրքի «ղասաբ»։ Մենք միշտ այստեղ ենք ապրել, պապիկներս էլ են ծնունդով այստեղից»,– նշեց Նարդոս պապը և հավելեց, որ երեկ երեկոյան մի քանի անգամ կրակոցի ձայն լսել է, ենթադրում է, որ Իշխանասարի կողմում է եղել։
Նա ընդգծեց, որ ժողովրդին եթե զինեն, իրենք վստահաբար կկարողանան պահել իրենց գյուղը։
Նարդոս պապը նաև շեշտեց, որ իր եղբոր տղան 2020 թվականին ՌԴ–ից եկել է Հայաստան, մասնակցել Արցախյան 44-օրյա պատերազմին և զոհվել։
Անգեղակոթցի մի կին էլ ասաց, որ սպասում են խաղաղ ապրելուն, քանի որ գիշերը չեն կարողանում գլուխները հանգիստ բարձին դնել։
«Երեխաս պայմանագրային զինծառայող է, հիմա էլ Իշխանասարում է, ո՞նց քնեմ։ Խոսել ենք մեր տղաների հետ, ասել են, որ ամեն ինչ նորմալ է, բայց չենք կարողանում հանգիստ ապրել, որևէ բանով զբաղվել»,– նշեց կինը։
Հիշեցնենք` նոյեմբերի 16–ին` ժամը 13։00-ի սահմանում, ադրբեջանական ԶՈւ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։
Դրանից հետո տեղային մարտեր էին սկսվել։
Արդյունքում հայկական կողմը 2 մարտական դիրք կորցրեց, ՀՀ պաշտպանական գերատեսչությունը հայտնեց 12 հայ զինծառայողի գերեվարման և մեկ զոհի մասին:
Նոյեմբերի 16–ին` ժ. 22։30–ի սահմաններում, ռուսական կողմի միջնորդությամբ կրակը դադարեցվեց։
Նոյեմբերի 17-ին ՀՀ ՊՆ–ն հայտնեց, որ նոյեմբերի 16–ի էսկալացիայի արդյունքում թշնամին ունի մինչև 70 զոհված և վիրավոր, հայկական կողմից կա 1 զոհ, 13 գերի։ Եվս 24 զինծառայողի հետ կապը մարտական գործողությունների ընթացքում կորել է, և նրանց ճակատագիրն այս պահին անհայտ է։