ԵՐԵՎԱՆ, 21 հոկտեմբերի – Sputnik. Թուրքիան ԱՄՆ ղեկավարությունից կպահանջի վերադարձնել մոտ 1,4 մլրդ դոլարը, որը վճարվել էր ամերիկյան F-35 կործանիչներ ձեռք բերելու համար։ Ինչպես տեղեկացնում է Anadolu գործակալությունը, Թուրքիայի նախագահ Ռեջեփ Թայիփ Էրդողանը հայտարարել է, որ դա կապված է Անկարային ինքնաթիռների ստեղծման նախագծից հանելու ամերիկյան որոշման հետ։
Թուրքիայի ղեկավարի խոսքով՝ կործանիչների մատակարարման շուրջ բանակցությունները դեռ շարունակվում են։ Այնուամենայնիվ, Էրդողանը պատրաստվում է գումարը վերադարձնելու մասին խոսել ԱՄՆ նախագահ Ջո Բայդենի հետ հանդիպման ժամանակ։ Հանդիպումը կկայանա հոկտեմբերի 30-31-ը Հռոմում G20 երկրների գագաթնաժողովի շրջանակում։
Հիշեցնենք` կործանիչների մատակարարման շուրջ վեճերը սկսվեցին, երբ Մոսկվան 2017 թվականին պայմանագիր կնքեց Անկարային C-400 զենիթահրթիռային համակարգեր (ԶՀՀ) մատակարարելու մասին: ՆԱՏՕ-ի բոլոր երկրները, այդ թվում՝ ԱՄՆ-ն, խիստ բացասական արձագանքի արժանացրին թուրքական կողմի որոշումը։ Վաշինգտոնը դեռ փորձում է հասնել նրան, որ Թուրքիան հրաժարվի ռուսական ԶՀՀ-ներից, ինչի կապակցությամբ միակողմանի պատժամիջոցներ է սահմանում։