Եվրասիական տնտեսական հանձնաժողովի Արդյունաբերական քաղաքականության վարչության պետի տեղեկալ Գեորգի Արզումանյանը Sputnik Արմենիայի եթերում անդրադարձել է օրենսդրական նախաձեռնությանը, ըստ որի` 2022-ի հունվարի 1-ից Հայաստանում կարգելվի մինչև 50 միկրոն հաստության պոլիէթիլենային տոպրակների իրացումը։
Պոլիէթիլենային ապրանքների որոշ տեսակների համար արգելքի հետ կապված ՀՀ փորձը դիտարկվել է ԵԱՏՄ սահմաններում, և Հայաստանից բացի նման աշխատանքներ արդեն իսկ իրականացվել են այլ անդամ պետություններում։ Sputnik Արմենիայի հետ զրույցում այս մասին ասաց Եվրասիական տնտեսական հանձնաժողովի Արդյունաբերական քաղաքականության վարչության պետի տեղեկալ Գեորգի Արզումանյանը։
Նա վկայակոչեց Բելառուսի օրինակը, որտեղ 2021 թվականի սկզբից հանրային սննդի վայրերում արդեն իսկ արգելվել է մեկանգամյա օգտագործման պլաստիկե սպասքը։ Ղազախստանն իր հերթին նախատեսում է 2025 թվականից արգելել որոշ տեսակի պոլիէթիլենային տոպրակների օգտագործումը, իսկ Ղրղզստանն էլ նախատեսում է պոլիէթիլենային տոպրակների օգտագործումն արգելել հանրային որոշ վայրերում, օրինակ` Իսիկ Կուլ լճի շրջակայքում։
«Բայց պետք է հասկանալ, որ այս աշխատանքները պահանջում են բավականին համապարփակ ուսումնասիրություն, որովհետև մենք պետք է դիտարկենք ապրանքների փաթեթների օգտագործման կամ այլ նյութերով փոխարինման հնարավորությունները, թեև պարզ է, որ կան տնտեսական խնդիրներ` կապված առևտրային ցանցերի հետ։ Հաշվի առնելով խնդրի կարևորությունը` ԵԱՏՄ տնտեսական խորհուրդը նախագահների մակարդակով 2020 թվականի դեկտեմբերի 11-ին ընդունեց կազմակերպության տնտեսական ինտեգրման ռազմավարությունը։ Դրանում ներառվեց առանձին մի կետ, որով մեզ հանձնարարվեց մշակել համակարգ և կատարել ուսումնասիրություն միանգամյա օգտագործման առանձին պլաստիկների փաթեթավորման փուլային արգելքի ներդրման հնարավորություն ընձեռելու համար»,– նշեց Եվրասիական տնտեսական հանձնաժողովի Արդյունաբերական քաղաքականության վարչության պետի տեղեկալը։
Արզումանյանի դիտարկմամբ` միանշանակ արգելելու կամ չարգելելու խնդիր չի դրվում, որովհետև երբ խոսք է գնում մեկանգամյա օգտագործման պլաստիկե իրերի մասին, այն ընդգրկում է մի շարք ապրանքների մեծ սպեկտր, որոնք օգտագործվում են ամենօրյա ռեժիմով, իսկ այսօր մենք դեռ պատրաստ չենք իսկույն փոխարինել այդ ապրանքների ամբողջական շարքը և հենց այդ պատճառով էլ Հայաստանն արգելք դրեց որոշակի բարակությամբ պոլիէթիլենային փաթեթավորման իրերի վրա։
Արզումանյանի հավաստամամբ` պոլիէթիլենային իրերի հետ կապված հարցի լուծումը կունենա մեծ էներգետիկ էֆեկտ բոլոր պետությունների համար և կնպաստի ոչ միայն շրջակա միջավայրի պահպանության խնդիրներին, այլև բնակչության առողջության պահպանման խնդրին։
Նրա տեղեկացմամբ` Եվրասիական տնտեսական հանձնաժողովի Արդյունաբերական քաղաքականության վարչությունը նախապատրաստում է համապարփակ ուսումնասիրության տեխնիկական առաջադրանքը` դիտարկելով սոցիալական ու բնապահպանական բոլոր գործոնները, որոնք կապված են արգելքի հնարավոր հետևանքների հետ։
Նշենք, որ ՀՀ շրջակա միջավայրի նախարարությունից հայտնել են, որ 2022-ի հունվարի 1-ից Հայաստանում կարգելվի մինչև 50 միկրոն հաստության պոլիէթիլենային տոպրակների իրացումը։
Նախարարությունն ընդգծել է, որ օրենսդրական փոփոխությունների և տնտեսվարողների հետ աշխատանքին զուգահեռ պետք է ամեն ինչ անել 2022-ի հունվարից օրենքի պահանջները պատշաճ կատարելու համար:
Ազգային ժողովն օրենքը ընդունել է 105 կողմ ձայներով: