ԵՐԵՎԱՆ, 8 հոկտեմբերի – Sputnik. ՔՊ–ական պատգամավոր Վահագն Ալեքսանյանը հերքում է շրջանառվող լուրերը, թե Գորիսի համայնքապետ Առուշ Առուշանյանի և իշխանության միջև ինչ–ինչ պայմանավորվածություններ կան։ Խորհրդարանական ճեպազրույցների ժամանակ Ալեքսանյանն անդրադարձավ այդ լուրերին` ասելով, որ դրանք իրականությանը չեն համապատասխանում։
«Մի քանի շաբաթ է, ինչ Գորիսում շշուկներ են տարածվում, որ Առուշ Առուշանյանի թիմը պայմանավորվածություն ունի իշխանության հետ։ Ըստ լուրերի` եթե Առուշանյանը հաղթի, ապա նրան ազատ են արձակելու, որից հետո դրա դիմաց նա հրաժարական է տալու։ Ուզում եմ հերքել այս տեղեկատվությունը` նման պայմանավորվածություն չկա և չի լինելու»,–ասաց Ալեքսանյանը։
Նա հավելեց` ՀՀ–ում ցանկացած մեկը, որը հանցագործություն է կատարել, իր պատիժը կրելու է։
Հիշեցնենք, որ Գորիս խոշորացված համայնքում առաջադրված թեկնածուները երեքն են։ Հիմնական մրցակցությունն ընթանում է գործող համայնքապետ Առուշ Առուշանյանի և «Քաղաքացիական պայմանագիր» կուսակցության թեկնածու Վլադիմիր Աբունցի միջև։ Ու որքան ընտրության օրը մոտենում է (հոկտեմբերի 17–ին է կայանալու), այնքան իրավիճակն ավելի է շիկանում։
Հավելենք, որ Առուշանյանն այս պահին կալանավայրում է, նա կալանավորվել է հուլիսի 16-ին: Գորիսի համայնքապետին մեղադրանք է առաջադրվել ՀՀ քրեական օրենսգրքի35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով և 38-154.2-րդ հոդվածի 3-րդ մասով (քվեարկության գաղտնիությունը խախտելը, ընտրական իրավունքի իրականացմանը խոչընդոտելը)։