ԵՐԵՎԱՆ, 6 հոկտեմբերի - Sputnik. Վրաստանի նախկին նախագահ Միխեիլ Սաակաշվիլու կինը՝ Սանդրա Ռուլոֆսը, արձագանքել է լուրին, որ իր ամուսինը նոր ընտանիք է ստեղծել Ուկրաինայի քաղաքական գործիչ Ելիզավետա Յասկոյի հետ։ Ռուլոֆսն ասել է, որ դա անսպասելի էր:
Սաակաշվիլին Facebook-ում տեսանյութ էր տեղադրել, որում ապշած հանրությանը ներկայացրել էր իր «նոր կնոջը»։ Տեսանյութը տեսագրվել է մինչև Սաակաշվիլու՝ Վրաստան ժամանելը։ Նորաթուխ զույգը ասել է, որ նրանք պայմանավորվել էին հրապարակել տեսահոլովակը Սաակաշվիլու ձերբակալվելու դեպքում։
Ռուլոֆսը, մեկնաբանելով տեսանյութը, նշել է, որ դրա բովանդակությունն անսպասելի է եղել իր համար, իսկ ներկայացման ձևը՝ բացարձակապես անընդունելի: Նախկին առաջին տիկինը խոստովանել է, որ շփոթված ընկերներն ու համախոհները անձնական կյանքի մասին հարցեր են տալիս իրեն։
«Չեմ թաքցնի՝ ուրբաթ երեկոյան հրապարակված տեսանյութի բովանդակությունն ինձ համար անսպասելի էր, իսկ ձևը՝ լիովին անընդունելի», – գրել է նա սոցիալական ցանցում:
Միաժամանակ Սանդրա Ռուլոֆսը ավելացրել է, որ Միխեիլ Սաակաշվիլուն համարում է քաղաքական բանտարկյալ ու պահանջում է նրան ազատ արձակել:
«Չնայած անձնական հույզերին, ես հանգստություն ու հավատ եմ պահպանում, որ մենք այս մարտից հաղթանակած դուրս կգանք», – նշել է նա:
Հիշեցնենք, որ հոկտեմբերի 1-ին Միխեիլ Սաակաշվիլու ձերբակալությունից հետո Facebook սոցիալական ցանցում հրապարակվել էր նրա տեսաուղերձը, որում քաղաքական գործիչը հայտնել էր, որ նոր ընտանիք է ստեղծել Ելիզավետա Յասկոյի հետ:
Յասկոն 31 տարեկան է։ Նա Ուկրաինայի Գերագույն ռադայի պատգամավոր է, Եվրոպայի խորհրդի խորհրդարանական վեհաժողովում Ուկրաինայի պատվիրակության նախկին ղեկավարը։ Միխեիլ Սաակաշվիլին ու Սանդրա Ռուլոֆսը երկու որդի ունեն՝ Էդուարդն և Նիկոլոզը։