ԵՐԵՎԱՆ, 4 hոկտեմբերի - Sputnik. Ուկրաինայի Գերագույն ռադայի պատգամավոր Ելիզավետա Յասկոն, որը հարաբերություններ ունի Վրաստանի նախկին նախագահ և Ուկրաինայի բարեփոխումների ազգային խորհրդի գործադիր կոմիտեի ղեկավար Միխեիլ Սաակաշվիլիի հետ, հայտնել է, որ մտադիր է շուտով Վրաստան մեկնել: Յասկոն Facebook-ի իր էջում տեսաուղերձով դիմել է իր հետևորդներին։
Ավելի վաղ Յասկոն տեսանյութ էր հրապարակել, որը ձայնագրվել էր Սաակաշվիլիի՝ Վրաստան կատարած այցից առաջ, որտեղ նա խոստովանել էր, որ իրենք հարաբերությունների մեջ են։ Յասկոն կոչ է արել ուկրաինական ու վրացական իշխանություններին, ինչպես նաև ԵՄ-ին ու ԱՄՆ-ին պաշտպանել է Սաակաշվիլիին։
«Ուզում եմ պատասխանել բոլոր հեյթերներին, որոնք վերջին օրերին արձագանքել ու ինձ ոչ այդքան հաճելի բաներ են գրել։ Զբաղվեք ձեր պետության կառուցմամբ, որտեղ էլ որ լինեք։ Ես գիտեմ, որ այժմ ի պաշտպանություն Միխեիլ Սաակաշվիլիի հանրահավաք է անցկացվում։ Շուտով կլինեմ Վրաստանում, բայց հիմա ժամանակն է, որ վրացիները պաշտպանեն իրենց ապագան։ Ուկրաինան պայքարելու է իր քաղաքացի Միխեիլ Սաակաշվիլու համար, պայքարելու է նաև միջազգային հանրությունը», - ասել է Յասկոն։
Հիշեցնենք` հոկտեմբերի 1-ի առավոտյան Վրաստանի նախկին նախագահը հայտնել էր, որ 8 տարի անց հայրենիք է վերադարձել, երեկոյան նրան ձերբակալել էին և տեղափոխել Ռուսթավիի բանտ։
Դատախազությունից ասել էին, որ նրա քրեական գործերով վճիռները բողոքարկման ենթակա չեն։
Այժմ Ուկրաինայի քաղաքացի Միխեիլ Սաակաշվիլին Վրաստանում հեռակա կարգով դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործով: Առաջինով նա դատապարտվել է 3 տարվա, երկրորդով՝ 6 տարվա ազատազրկման։ Բացի այդ, Սաակաշվիլին ներգրավված է 2007թ․-ի նոյեմբերի 7-ին ընդդիմադիր հանրահավաքը ցրելու, «Իմեդի» հեռուստաալիքում իրականացված հարձակման և պետբյուջեի միջոցների մսխման գործերով։ Այդ գործերը դատարանները դեռ քննում են, դատավճիռներ առայժմ չեն կայացվել։
Մինչ այդ հայտնի էր, որ Սաակաշվիլին ամուսնացած է Հոլանդիայի քաղաքացի Սանդրա Ռուլոֆսի հետ։ Ամուսինները երկու որդի ունեն։