Խաղաղապահ զորախմբի մարդասիրական արձագանքման ռուսական կենտրոնի մասնագետները բարերարների հետ համատեղ հերթական մարդասիրական ակցիան են կազմակերպել Լեռնային Ղարաբաղի մանկապարտեզներին, դպրոցներին և համալսարաններին օգնություն ցուցաբերելու նպատակով: Տեղեկությունը հայտնում է ՌԴ պաշտպանության նախարարությունը։
Ակցիայի շրջանակում ռուս խաղաղապահները դպրոց-ինտերնատի տարածքում կարուսել են տեղադրել և մարզական ու մանկական հրապարակ ստեղծել սաների համար:
«Երևանից Ստեփանակերտ է հասցվել մանկական խաղահրապարակ, որը ձեռք է բերվել «Մերսի» բարեգործական կազմակերպության կողմից: Տեղափոխումն իրականացվել է ռուսական խաղաղապահ զորակազմի տրանսպորտային միջոցներով»,- հայտնել է զորակազմի ներկայացուցիչ Դմիտրի Տուսիդին:
Դպրոցի երեխաներն ու դաստիարակները շնորհակալություն են հայտնել ռուսական խաղաղապահ զորախմբի մարդասիրական արձագանքման կենտրոնի մասնագետներին և բարեգործական հիմնադրամի ներկայացուցիչներին։
Ստեփանակերտի գիշերօթիկ դպրոցում սովորում է 18 սան Լեռնային Ղարաբաղի սոցիալապես անապահով ընտանիքներից:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: